Primeiru-Ministru, Taur Matan Ruak. Imajen Tatoli/Egas Cristóvão.

DILI, 18 maiu 2022 (TATOLI)–Primeiru-Ministru (PM), Taur Matan Ruak, husu ba Prezidente Repúblika (PR) eleitu, José Ramos Horta, atu hametin paz durante mandatu.

“Ha’u espera ho laran haksolok, Prezidente foun ne’ebé sei toma pose iha loron 19 maiu kalan, bele kontinua hatutan buat di’ak ne’ebé husik hela,” Xefe Governu hateten liuhosi nota ne’ebé Agência Tatoli simu, kuarta ne’e.

Nune’e, Xefe Ezekutivu agradese ba Prezidente Repúblika sesante, Francisco Guterres ‘Lú Olo’ nia kontribuisaun durante mandatu.

“Agradese ba Prezidente sesante ne’ebé hametin paz no estabilidade, ne’ebé la hamosu krize ruma hodi afeta ba vida nasaun, maski durante mandatu, nia Prezidénsia mosu impase polítika no instabilidade governativa. Hein ho kontente Prezidente Repúblika foun José Ramos Horta ne’ebé sei simu pose iha loron 19 maiu kalan fahe-rua, sei banati obra ida-ne’e hodi hametin nafatin paz no estabilidade atu iha fatin ba dezenvolvimentu, tanba krize sei lori de’it desgrasa ba Timór no timor-oan tomak mak sei lakon,” PM dezeja.

Notísia relevante: Mensajen Estadu ba loron restaurasaun independensia ba dala XIX

Xefe Governu konsidera paz no estabilidade iha situasaun agora importante tanba mundu ohin loron hasoru dezafiu boot.

“Hametin paz no estabilidade para que fó dalan iha tempu krize sira hanesan ne’e, hanesan krize funu Rúsia no Ukránia, pandemia COVID-19, krize alimentár, krize dezastre naturál, bele fó dalan, fó tempu no fó fatin ho enerjia no esforsu, ho dedikasaun no ho rekursu uitoan ne’ebé kontinua dezenvolve ita-nia nasaun,” nia akresenta.

PM konsidera, Prezidente di’ak ida fó estabilidade polítika no governativa ba povu Timór, nune’e iha tempu oportunu halo dezenvolvimentu hodi hasai povu hosi kiak no mukit.

“Krize sei la lori benefísiu ba timor-oan sira, pelu kontráriu sei halo timor-oan lakon tempu, lakon rekursu no ita-nia dezenvolvimentu marka pasu,” nia tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here