Vensedór primeiru lugar ba kompetisaun pintura, Novelio Francisco de Sousa. Imajen/MTKI

DILI, 18 maiu 2022 (TATOLI)–Ministériu Turizmu Komérsiu no Indústria (MTKI) liuhosi Diresaun Nasional Promosaun Turistiku no Relasaun Internasional (DNPTRI) hili Pintór hosi grupu Tais-Art, Novelio Francisco, sai vensedór primeiru lugar ba kompetisaun pintura.

Kompetisaun ne’e realiza iha loron 16 maiu, iha ámbitu komemorasaun loron restaurasaun indepedénsia Timor-Leste ba da-XX iha loron 20 maiu, ho objetivu atu promove marka Explore The Undiscovered ba mundu internasionál no nasionál, hodi hasa’e koñesimentu no hadi’a kualidade  pintura ba juventude, ne’ebé  iha kreatividade no promove pintura iha área turizmu, nune’e ikus mai MTKI hili pintór na’in-neen sai vendedór ba kompetisaun pintura ne’e.

“Juventude durante loron-rua partisipa kompetisaun pintura ne’e. Ita haree hotu kualidade no sira ne’ebé sai vensedór, ita kontente tebes tanba ida-ne’e hatudu katak ita mós bele kompete iha nível internasionál,” Vise-Ministra Turizmu Komunitáriu no Kulturál, Inácia da Conceição Teixeira, hateten, liuhosi nota komunikadu ne’ebé Agência Tatoli asesu, kuarta ne’e.

Notísia relevante: Kompetisaun pintura iha ámbitu restaurasaun independénsia atu dezenvolve talentu

Prosesu pintura to’o agora kompara ho tinan liubá ho tinan ne’e, sente katak juventude kreatividade pensamentu liga ba turizmu ne’e mais profundu.

“Espera ho prosesu ne’e bele halo ligasaun ba rai-li’ur, hodi juventude sira bele kompete  iha nível internasional. Tanba pintura sira ne’e ho valór boot tebes hosi ema ne’ebé kompreende pintura sira bele hatene katak iha kualidade arte ne’ebé dala-ruma ita labele espresa ho liafuan, bainhira ita ko’alia kona-ba pintura,” nia akresenta.

Nune’e, Vensedór, Novelio Francisco de Sousa, hateten, nia parte kontente tebes tanba MTKI bele realiza kompetisaun pintura hodi sira bele hatudu kreatividade.

“Ha’u agradese ba ministériu bele realiza kompetisaun pintura, hodi ami bele hatudu kreatividade pintura iha área turizmu no ha’u sai vendedór tanba ha’u hili dezeñu fatin Ili Kere-Kere iha munisípiu Lautém, postu administrativu Tutuala, tanba fatin ne’e atrai tebes turista lokál no internasionál hodi ba vizita, no fatin ne’e nakonu ho nia istória rasik,” Vensodór tenik.

Nune’e, vensedór sira sei manán osan, hahú hosi primeiru lugar Novelio Francisco hetan osan $750, vensedór segundu lugar hosi Jeremias hosi grupu Arte Gembel hetan osan $500, terseiru lugar Almeida Gusmão hosi Arte Moris hetan osan $250, kuartu lugar Cizer  Bento hosi Arte Furak hetan osan $150, kintu lugar Júlio Hornai hosi Arte Varacha hetan osan $125 no sestu lugar Tome Guterres hosi Arte Lorik hetan osan $75, inklui sertifikadu hosi MTKI.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here