Grupu Ter Um Terik aprezenta traje (roupa) tradisionál. Imajen Tatoli/Celestina Teles.

COVALIMA, 18 maiu 2022 (TATOLI)—Sekretáriu Administradór Munisípiu Covalima, Francisco de Jesus Alves, konsidera kultura Timor-Leste mak sai hanesan identidedade ne’ebé tenke hametin no prezerva.

“Kada tinan ita sempre hatudu Kultura Covalima nian, tanba kultura mak Nasaun nia identidade ne’ebé espesiál. Kultura Covalima nian hanesan hatais asesoria Kultura nian ne’ebé uluk bei-ala sira rai hela ba jerasaun foun bele prezerva no hametin nafatin,” Fransisco de Jesus Alves hateten liuhosi diskursu iha abertura kompetisaun dansa tradisionál (kultura), iha kampu futeból Ladi, Camanasa, kuarta ne’e.

Seksaun kultura realiza kompetisaun dansa tradisionál ne’e iha ámbitu atu komemora loron restaurasaun independénsia Timor-Leste ba dala-XX (20 maiu 2002-20 maiu 2022) hodi anima komunidade Covalima.

“Ohin, ita-boot sira mai iha ne’e hatais tais (traje tradisionál) ne’ebé mesak kapaas, kesi Kaibauk no tara belak, ne’ebé uluk ita-nia avó sira rai hela mai-ita. Ohin, jerasaun lubuk ida, ita-nia inan sira balun mós involve iha laran hotu, atu kontinua nafatin hodi prezerva, nune’e kultura ne’e labele lakon,” nia dehan.

Koordenadór Seksaun Kultura, António Sarmento, reforsa kompetisaun kultura tebedai tradisionál iha munisípiu Covalima ne’ebé partispa hosi grupu 12 ne’ebé aprezenta mai hosi suku no eskola sira.

Kompetisaun ne’e aprezenta hosi estudante sira hosi eskola sekundáriu no tekniku vokasionál no suku sira mak hanesan Suku Debos, Camenasa, Suai Loro, Labarai no suku Beco ne’ebé pertense ba postu administrativu Suai Vila.

Partisipante sira-ne’ebé maihosi eskola mak Eskola Sekundária Jerál publika Suai, eskola  sekundáriu tékniku vokasionál Akar-Laran no Cristal, eskola sekundária Katólika Ave Maria Suai, eskola Café suai no hosi grupu treinadu sira mak hanesan grupu Lenkede hosi Ogues no grupo Primavera hosi Matai.

Hafoin aprezentasaun, komisaun organidora liuhosi seksaun kultura sei entrega prémiu ba grupu no estudante sira-ne’ebé sai vensedór hanesan primeiru lugar to’o terseiru lugar ne’e sei hetan osan.

“Grupu ne’ebé sai vensedór primeiru no terseiru lugar, ami sei entrega prémiu hodi hetan valorizasaun osan hosi komisaun organizadora no sira-ne’ebe la manán iha kompetisaun ne’e, komisaun sei iha osan transporte ba sira,” nia hateten.

Gryupu sira-ne’ebé hetan primeiru lugar sei hetan osan $175.00, segundu lugar sei hetan osan $150.00 no terseiru lugar sei hetan osan $125.00, maibé ba sira-ne’ebé la manán ne’e komisaun sei fasilita osan transporte $50.00 ba sira.

Jornalista : Celestina Teles

Editór       :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here