Eis Eskola Xina no atuál Eskola EBF de Nuu-laran iha Bairro Formosa, Dili. Imajen/Espesiál

DILI, 18 maiu 2022 (TATOLI)—Komunidade xineza iha Timor-Leste planeia harii foun eis Eskola Xina no atuál Eskola Ensinu Báziku Filiál (EBF) de Nuu-laran iha Bairro Formosa, sai Eskola Referénsia ho jestaun privada.

Prezidente Associação Comercial da Comunidade Chinesa Timorense (ACCCTL), Kathleen Gonçalves, informa, asosiasaun prevee ona $320.000 no selebra akordu ho Ministériu Edukasaun Juventude no Desportu (MEJD) hodi realiza inisiativa ne’e.

“Ami-nia mehi atu hadi’a eskola ne’e ho ami-nia jestaun atu asegura ensinu kualidade iha eskola, hahú hosi profesór ne’ebé kualifikadu no esperiénsia, tanba Eskola de Nuu-laran nu’udar eskola xina antiga iha Dili. Objetivu asina memorandu entendimentu ho MEJD atu hametin kooperasaun serbisu,” Prezidente ACCCTL hateten iha Timor-Plaza, kuarta ne’e.

Notísia relevante: MEJD prevee OR millaun $9 apoiu estudante sira iha eskola públiku no privadu

Nune’e, asosiasaun sei hein desizaun hosi MEJD atu realiza planu, maibé daudaun ekipa prepara ona Bill of Quantity (BoQ) inklui halo koordenasaun no preparasaun ho entidade relevante.

“Ami identifika ona iha Eskola Ensinu Báziku Filiál ne’e iha sala aula haat maka ninia kondisaun grave tebes. Ami hato’o ona proposta ba MEJD atu harii foun no ami mós iha ona interese atu hadi’a eskola foun ho andár rua, ho sala aula ualu inklui hariis fatin ualu, haat ba mane no haat ba feto,” nia akresenta.

Tuir Kathleen, bainhira prosesu hotu la’o loos ona, mak sei reabilita infraestrutura eskolár no sei aumenta tan sala aula foun iha eskola refere, hahú hosi sala profesór, sala ba estudante, sala ba administrasaun no sala ba biblioteka.

“Karik asesór ministériu sira sei haree no lee didi’ak lai proposta ne’ebé ami submete atu apár ho lei sira atu fó dalan ba ami bele konstroi ka lae,” nia tenik. 

ACCCTO mak sei responsabiliza konstrusaun sira no MEJD sei apoiu funsionamentu prosesu ensinu aprendizajen hanesan prepara kurríkulu no seluk tan.

“Eskola ne’e la’ós ba maluk xineza sira de’it, maibé ba timor-oan tomak nune’e bele kontribui ba dezenvolvimentu nasaun nian,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here