Asosiasaun futeból Viqueque realiza jogu futeból feto hodi komemora loron restaurasaun independénsia ba da-XX, iha kampu futeból Viqueque, kuarta (18/05). Imajen Tatoli/Vitorino Lopes da Costa

VIQUEQUE, 18 maiu 2022 (TATOLI)—Asosiasaun futeból munisípiu Viqueque ho inisiativa realiza jogu futeból ba feto iha ámbitu komemorasaun restaurasaun independénsia ba da-XX iha loron 20 maiu 2022.

“Objetivu realiza jogu ne’e atu komemora loron restaurasaun independénsia, nune’e liuhosi jogu ita buka talentu alin feto sira hodi sira mós prepara-an ba jogu sira tuir mai,” Prezidente Komisaun jogu feto, Alfredo Baros Clave, hateten ba Agência Tatoli, hafoin abertura jogu iha kampu futeból Viqueque, kuarta ne’e.

Notísia relevante: Viqueque realiza atividade tolu iha ámbitu komemora restaurasaun independénsia

Asosiasaun futeból Viqueque daudaun ne’e iha ona planu atu buka feto petensiál sira ne’ebé iha talentu hodi partisipa jogu iha nasionál.

“Iha nasionál loke hela liga ba feto, ho ida-ne’e asosiasaun iha planu hodi prepara alin feto sira tuir eventu jogu futeból,” nia akresenta.

Asosiasaun munisípiu Viqueque fó apoiu orsamentu hamutuk $1.000 ba komisaun hodi jere jogu futeból ba.

“Maski montante orsamentu ba komisaun kiik, maibé ami ho kompromisu hakarak organiza jogu to’o finál. Importante maka ita bele komemora loron restaurasaun independénsia tinan ne’e,” nia tenik.

Jogu futeból feto ba manán-nain sira, primeiru lugar sei hetan $200, segundu lugar $150 no terseiru lugar $100.

Jogu partisipa hosi klubu hamutuk ualu no goju ne’e hahú ohin abertura no sei ramata loron 28 maiu.

Iha fatin hanesan, reprezentante administradór munisípiu Viqueque, Domingos Monteiro de Carvalho, dehan, realizasaun jogu futeból feto hodi komemora loron restaurasaun independénsia no liuhosi jogu ida-ne’e bele hasa’e telentu feto sira hodi partisipa iha nível nasionál.

“Ha’u husu asosiasaun futeból Viqueque se bele promove talentu feto sira iha mundu futeból. Jogu femenina iha Timor-Leste ita foin maka hahú, tanba ne’e alin feto sira mós prepara-an sai jogadór feto ne’ebé di’ak iha futuru,” nia hato’o.

Jogu abertura dahuluk hosi klubu Jamazola no klube Alfa, ho rezultadu jogu 1-0.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here