Grupu Ter Um Terik aprezenta traje (roupa) tradisionál. Imajen Tatoli/Celestina Teles.

COVALIMA, 18 maiu 2022 (TATOLI)—Xefe ekipa konjunta kontribuidór atividade komemorasaun 20 maiu, Silvester Ferreira, hateten grupu 24 ne’ebé mak aprezenta talentu hodi anima komunidade iha ámbitu komemorasaun loron independénsia Timor-Leste ba dala-XX (20 maiu 2002-20 maiu 2022).

Atividade ne’ebé estudante no joven sira aprezenta hodi anima komunidade sira mak hanesan aprezensaun drama, traje (roupa) tradisionál, diskursu, poezia, bidu tradisionál no kanta muzíka moderna no tebe-tebe.

“Ami rejista ona grupu 24 mak atu hatudu sira-nia talentu hodi anima ita-nia komunidade sira hodi komemora loron restaurasaun independénsia Timor-Leste 20 maiu iha munisípiu Covalima ne’ebé organiza atividade ekipa volontáriu hosi ekipa konjunta kontribuidór,” Silvester Ferreira hateten  liuhosi nia diskursu iha kampu Ladi, kuarta ne’e.

Grupo 24 ne’ebé atu aprezenta sira-nia talentu ne’e hosi estudante sekundaria jerál públiku Suai, Centru Juventude Covalima, Estudante tekniku vokasionál kristal, Unpaz Ramu Covalima, Asosiasaun Estudante Juventude Suai  (AEJS) ne’ebé iha duni talentu halo animasaun iha eventu ida-ne’e.

Ekipa konjunta kontributór atividade komemorasaun 20 maiu sei la entrega prémiu ba estudante sira-ne’ebé mak aprezenta sira-nia talentu tanba ho intensaun atu anima de’it komunidade hodi festeza loron restaurasaun independénsia Timor-Leste nian.

“Ami hakarak hateten ba públiku katak atividade ne’e ami kria ho voluntáriu. Ami la buka sé mak atu sai vensedór no ami sei la fahe prémiu ba sira. Ami halo de’it animasaun ba komunidade meiu ida atu festeza loron independénsia ne’e,” nia dehan

Administradór Munisípiu Covalima, Francisco de Andrade, louva inisiativa hosi ekipa konjunta kontribuidór ba atividade komemorasaun 20 maiu hodi anima komunidade tanba tempu ona juventude Covalima atu hatudu sira-nia talentu.

“Ha’u orgulu no louva ekipa ida-ne’e. Maske sira laiha osan, osan ne’ebé iha ho inisiativa hodi halo animasaun ba komunidade tanba tempu to’o ona juventude Covalima atu hatudu talentu ne’ebe di’ak, nune’e Covalima labele lakon ho munisípiu sira seluk,” nia hateten.

Autoridade munisipál ne’e mós husu ba ekipa konjunta kontribuidór atividade komemorasaun 20 tenke kontinua no bainhira hasoru difikuldade koordena ho autoridade lokál bele ajuda.

Tanba, nia dehan, durante ne’e ekipa refere realiza ona atividade sira hanesan hahú halo limpeza jerál, asaun karidade no halo animasaun ba komunidade maibé la fasil esforsu ho voluntáriamente.

“Ha’u-nia mensajen, Covalima ita-nian, hatudu talentu ne’ebé imi iha. Neineik ita bebeik ne’e bele. Se la’ós ema Covalima sé tan. Se la’ós agora bainhira tan. Ha’u dezafia joven sira atu prepara an bele la’o ba oin,” nia tatoli.

Atividade kulturál ne’e inisia no apoiu hosi Eskola Sekundáriu Públiku Suai, Unpaz Ramu Covalima, Centro Juventude Covalima, Rádio Comunidade Cova Taroman, Asosiasaun Estudante Juventude Suai  (AJS), Conselho Nasionál Juventude Munisípiu (CNJM)  no  Eskola Sekundáriu Téniku Vokasionál (Cristal).

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here