Preparasaun finál fatin serimónia investidura ba Prezidente Repúblika eleitu iha Tasi-Tolu, kuarta (19/05), atinje ona 100%. Imajen TATOLI/António Daciparu.

DILI, 18 maiu 2022 (TATOLI)–Ministru Administrasaun Estatál (MAE), Miguel Pereira de Carvalho, informa bainaka konfirmadu hosi nasaun 11 no organizasaun multilateral rua (2) mak sei partisipa serimónia investidura ba Prezidente Repúblika eleitu períodu 2022-2027, José Ramos Horta, no komemorasaun 20 maiu 2022.

Notísia Relevante: Bainaka espesiál 14 sei partisipa serimónia investidura PR eleitu

“To’o ohin loron, konvidadu sira hosi nasaun 11 no mós organizasaun multilaterál rua hosi g7+ no Comunidade Paises da Lingua Portuguesa (CPLP) ne’ebé konfirmadu ona atu marka prezensa. Nune’e mós iha Xefe Estadu na’in-rua hanesan Prezidente Repúblika Portugál no Governadór Austrália nian mak sei marka prezensa,” Governante ne’e hateten ba jornalista sira, hafoin partisipa misa agradesimentu ba serimonia investidura PR eleitu no komemorasaun 20 maiu, iha igreja katedrál Vila Verde, Dili, kinta ne’e.

Nia informa, Prezidente Repúblika Portugál, Marcelo Rebelo, sei hela iha Hotel Timor no Governadór Austrália hela iha Timor Plaza, no bainaka espesiál sira balun mós ninia fatin preparadu ona.

Governante ne’e hateten, iha nível Xefe Governu nian mak Primeiru-Ministru Guiné Bissau, Nuno Gomes Nabiam no aleinde ne’e enviadu hosi nasaaun sira seluk hanesan Mocambique, Cabo Verde, São Tome e Prinsipe, Japaun, Indonézia, Singapura, Ángola no Brasil.

“Ho ne’e komisaun organizadora preparadu atu simu ita-nia konvidadu sira hodi ba hela iha fatin ne’ebé mak komisaun prepara hotu ona,” Miguel hateten.

Hosi bainaka hirak ne’e, nia dehan, konvite hosi PR eleitu, José Ramos Horta, PR, Francisco Guterres “Lú Olo”, Primeiru-Ministru, Taur Matan Ruak, Prezidente Parlamentu Nasionál, Ministra Negósiu Estranjeiru no Kooperasaun (MNEK) nian ba nia omólogu sira iha internasionál sira.

“Ha’u propriu mós konvida bainaka maibé la’ós nível hanesan Xefe Estadu no Xefe Governu no sira ne’e maiória hosi Ázia no CPLP nian ho Austrália,” nia dehan.

Tuir nia, bainaka hirak ne’e ohin (kuarta, 18 maiu 2022) sei to’o iha Timor-Leste no aban sei partisipa serimónia investidura PR eleitu períodu 2022-2027.

Entretantu, progresu preparasaun fatin ba serimónia investidura Prezidente Repúblika eleitu períodu 2022-2027 iha Tasi-Tolu ne’e atinje ona 100%, no entermu serimoniál hanesan ensaiu no isár bandeira ohin termina ona.

“Ha’u bele dehan katak preparativu ba eventu ne’e 100% ona,” nia dehan.

Notísia Relevante: PNTL-PM halo simulasaun asegura bainaka espesiál

MS-AIFAESA inspesiona ai-han no otél ne’ebé prepara ba bainaka espesiál

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here