Autoridade Covalima realiza kompetisaun kuda halai taru hodi komemora loron restaurasan independénsia ba dala-XX hodi anima komunidade. Imajen Tatoli/Celestina Teles.

COVALIMA,  18 maiu 2022 (TATOLI)—Autoridade Covalima liuhosi Sekretáriu Administradór Munisípiu Covalima, Francisco de Jesus Alves, husu ba komunidade atu apoia nafatin hodi kontinua realiza kompetisaun kuda halai taru atu bele harame liután munisípiu Covalima.

“Husu ba komunidade atu nafatin apoia atividade ida-ne’e no fó nafatin korajen ba ita-nia kuda na’in-sira hotu. Ho kompetisaun ida-ne’e, komesa ohin ba oin, fó hanoin ba ema ida-idak hodi kesi kuda, nune’e iha komemorasaun 28 novembru ne’e, ita halo kompetisaun ida-ne’e rame liután no ida-idak mai ho nia kuda ho preparasaun di’ak liu, ita bele kompete,” Francisco de Jesus Alves hato’o liuhosi nia diskursu bainhira halo abertura kompetisaun kuda halai taru iha kampu Suai Loro, kuarta ne’e 

Komisaun organizadora realiza atividade kompetisaun kuda halai taru ne’e atu komemora loron Independensia Timor-Leste ba dala-XX (20 maiu 2022-20 maiu 2022), nune’e autoridade Covalima hato’o agradese ba kuda na’in sira prepara kuda hodi halo kompetisaun atu anima komunidade iha fatin ida-ne’e. 

“Hodi komisaun organizadora nia naran hato’o agradese ba ita-nia kuda na’in sira hotu ne’ebé ohin lorokraik ida-ne’e, sira prepara atu halo kompetisaun atu anima ita iha fatin ida-ne’e,” nia hateten. 

Durante Timor-Leste ukun an tinan 20 ona, sidadaun sira-ne’ebè kesi kuda sente triste tanba Governu liuhosi autoridade munisipál nunka realiza kompetisaun kuda halai taru iha Covalima.

Tanba, nia dehan, maske realiza kompetisaun kuda halai taru no komisaun organizadora sira prepara prémiu ne’ebè kiik kompara ho kustu kesi kuda ne’e boot liu fali. 

“Ita hotu hatene kesi kuda nia kustu boot tebes. Maske komisaun prepara prémiu ba ita-nia kuda na’in sira maibé premiu ne’e kiik liu konta ho gastu ne’ebé kuda na’in sira hodi halo tratamentu ba sira-nia kuda,” nia esplika.

Prezidente Konselu Veteranu Munisípiu Covalima, Osório Soares Mausoko, hateten kompetisaun kuda halai taru ne’e hala’o ona ba dala-rua.

“Ohin ha’u mai iha ne’e realiza atividade kompetisaun halai taru kuda ba dala-rua maibé iha tempu okupasaun Indonésia ne’e realiza kompetisaun kuda halai taru iha loron nasionál no realiza bazar kalan,” nia hateten 

Kompetisaun kuda halai taru ne’e partisipa hosi Sekretáriu Administrasaun Munisípiu Covalima, Francisco Alves, Prezidente konsellu Veteranu Covalima, Segundu Komandante PNTL Munisípiu Covalima no komunidade.

Jornalista : Celestina Teles

Editór       : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here