Jerente Programa ACbit, Domingas Maria Silva. Imajen Tatoli/Natalino Belo.

BAUCAU, 18 maiu 2022 (TATOLI) – Asosiasaun Chega ba Ita (ACbit) kuarta ne’e, realiza semináriu promove produtu lokál hakbiit ekonomia feto sobrevivente ho objetivu halibur feto subrevivente sira hodi fahe informasaun kona-ba promove produtu lokál.

ACbit serbisu hamutuk ho Hivos People Unlimited ni FOKUPERS ne’ebé hetan apoia finanseiru hosi Uniaun Europeia (EU) ho tótal orsamentu hamutuk $ 550.000 atu halo promosaun ba inkluzaun sosiál no haforsa ekonomia feto sobrevivente no vítima violénsia iha Timor-Leste.

ACbit realiza semináriu ho grupu alvu sira kona-ba haforsa ekonomia iha salaun Apuramentu Munisipál Vila Nova, Baucau, kuarta (18/05). Imajen Tatoli/Natalino Belo.

“Ami-nia espetativa liuhosi semináriu ida-ne’e fó koñesementu ba grupu alvu sira hodi liga sira ba parseiru organizasaun sira-ne’ebé bele reforsa liután abilidade nune’e iha espasu ba vítima sira hodi promove di’ak liután produtu lokál,” Jerente Programa Asosiasaun Chega ba Ita (Acbit) Domingas Maria Silva hateten iha Vila Nova, kuarte ne’e.

ACbit apoia feto subrevivente sira iha territóriu nasionál hamutuk tótal 314 tantu individu no grupu no kontinua halo akompañametu hanesan asisténsia kona-bá modelu negósiu ne’ebé fundu hosi parseiru nasionál no internasionál.

ACbit mós hetan apoia fundu hosi governu liuhosi Sekretaria Estadu ba Igualidade no Inkluzaun (SEII) ne’ebé apoia orsamentu rotativa ba kada grupu $1.500, Ministeiru Solidaridade Sosiál Inkluzaun (MSSI) liuhosi fundu kiik no Sentru Nasionál Chega (CNC, sigla Portugés) ne’ebé apoia orsamentu ba vítima sira hodi reforsa atividade negósiu.

ACbit apoia mós materiál negósiu hanesan mákina suku ropa, kabas soru-tais, ekipamentu kioske no permakultura hanesan fini modo tahan hodi dezenvolve kada grupu.

“Inportante mak hakbiit sira atu sai hosi problema hanesan violénsia bazea ba jéneru no haforsa sira iha ekonomia,” Domingas akresenta.

Acbit apoia ona feto vítima ba violénsia doméstika bazea ba jéneru no vítima sobrevivente iha munisípiu Baucau hamutuk 150-resin kompostu postu admistrativu rua hanesan Baucau vila no Quelicai.

Partisipa iha semináriu refere mak individu no grupu alvu iha Baucau, liuliu vítima violénsia doméstika bazea ba jéneriu no subrevivente pasadu no feto potensiál ne’ebé hala’o atividade negósiu ki’ik hanesan fila-liman, negosiantes fa’an produtu lokál.

Jornalista    : Natalino Belo

Editór          : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here