Sekretaria Estadu Komunikasaun Sosiál (SEKOMS) liuhosi Diresaun Nasionál Promosaun Dezenvolvimentu Mídial Lokál, fó hela formasaun jornalizmu bázika ba joven sira iha postu administrativu Maliana, munisípiu Bobonaro. Imajen Tatoli/Sergio da Cruz.

BOBONARO, 17 maiu 2022 (TATOLI) – Sekretaria Estadu Komunikasaun Sosiál (SEKOMS) liuhosi Diresaun Nasionál Promosaun Dezenvolvimentu Mídia Lokál (DNPDML), tersa ne’e fasilita formasaun jornalizmu bázika ba joven sira iha postu administrativu Maliana, munisípiu Bobonaro.

Xefe Ekipa Delegasaun hosi DNPDML, Celestino de Araújo Freitas, esplika governu iha komitmentu atu apoiu serbisu meiu komunikasaun hotu tantu plataforma online, imprime no eletrónika.

Nune’e atividade  DNPDML nian serbisu hamutuk ho Rádiu Komunidade Maliana (RKM) ho objetivu atu lori joven sira koñese didi’ak kona-bá serbisu no lala’ok míia nian, nune’e bele iha esperiénsia natoon bainhira partisipa konkursu públiku iha mídia nasionál no lokál.

Nia haktuir, iha tinan kotuk atividade formasaun ne’e foka de’it ba jornalista sira-ne’ebé serbisu iha meiu komunikasaun, liuliu iha rádiu komunidade ne’ebé establese iha munisípiu 12 no Rejiaun Administrativu Espesiál Oe-Cuse Ambeno (RAEOA).

“Tinan ida-ne’e ami halo mudansa oituan, entaun ita akumula joven sira iha Bobonaro, liuliu iha postu Maliana oinsá mak bele hola-parte hotu iha formasaun ne’e atubele hatene serbisu mídia ne’e oinsá, no  bele komprende oinsá mak halibur informasaun no oinsá mak bele prodús programa,” nia hateten iha intervensaun.

Matéria ne’ebé foka iha formasaun durante loron rua ne’e mak hanesan, oinsá halo notísia bázika, produsaun dukumentáriu, publisidade no produsaun pakote.

Biban ne’e, Administradór Postu Administrativu Maliana, Tomás Lacu-loe, agradese no apresia ba governu tanba bele fó oportunidade ba joven sira atu aprende serbisu mídia nian.

“Ha’u husu partisipante sira hotu durante formasaun labele hanoin mai atu simu de’it  sertifikadu, maibé tenke hatudu ita-boot sira-nia matenek no vontade, atu nune’e aban bainrua iha fatin ruma presiza karik, imi iha ona koñesimentu oituan bele ba kompete,” nia fó hanoin.

Partisipante Georgino Romeo, sente kontente bele hola parte iha atividade ne’e tanba liuhosi formasaun ne’e bele iha koñesimentu bázika ba lala’ok serbisu órgaun komunikasaun sosiál.

“Hau foin primeira-vez tuir formasaun ida-ne’e, sente katak importante tebes tanba durante ami laiha koñesimentu liu kona-bá servisu jornalista nian, dalabarak ami hakarak aprende maibé laiha oportunidade,” nia akresenta.

Partisipante sira-ne’ebé partisipa iha atividade formasau ne’e hamutuk na’in-13 kompostu hosi feto na’in-hitu no mane na’in-neen. Partisipante na’in hirak-ne’e barak liu mak idade joven ne’ebé foin remata estudu iha nível sekundáriu no univsersitáriu maibé sei dezempregu hela.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here