Diretór PNDS Munisípiu Bobonaro, Paulino Viegas Tilman. Imagen Tatoli/Sérgio da Cruz.

BOBONARO, 17 maiu 2022 (TATOLI) – Programa Nasionál Dezenvolvimentu Suku (PNDS) munisípiu Bobonaro sei halo re-verifikasaun ba benefisiáriu programa Uma Kbiit Laek (UKL) faze daruak iha iha suku balun iha postu administrativu Maliana no Lolotoe.

Diretór PNDS Bobonaro, Paulino Viegas Tilman, hateten razaun halo fali re-verifikasaun ne’e bazea ba karta protesta ne’ebé komunidade submete katak deskonfia ekipa verifikadór sira prátika favoritizmu tanba iha uma-kain balun la prienxe madatalan ba programa ne’e sai hotu benefisiáriu.

“Ami tenke tún fali ba halo re-verifikasaun ba ninia prosesu identikasaun benefisiáriu ne’e tuir duni nia matadalan ka lae, depois ita haree kuandu iha duni indikasaun hanesan ita tenke re-verifika atu koloka ema sira-ne’ebé merese atu hetan duni,” nia informa Tatoli, iha kna’ar-fatin, Maliana, tersa ne’e.

Nia akresenta, loloos ne’e atividade re-verifikasaun hahú ona, maibé tanba iha líder komunitária okupadu hela servisu, sei adia fali hafoin serimónia komemorasaun Loron Restaurasaun Independénsia 20 maiu.

Ekipa verifikadór sira-ne’ebé sei tún ba terrenu mak hanesan, ekipa PNDS munisípiu no postu, Ekipa Jestau Suku (EJS), Polisia Nasionál Timor-Leste, xefe suku no xefe aldeia.

“Uma ne’ebé komunidade sira halo protestu mak iha Maliana, liuliu suku Raifun no Lahomea no iha postu Lolotoe mós iha suku rua mk komunidade reklama, tanba ne’e ami iha devér tomak atu tún ba terrenu atubele tau sasán sira-ne’e tuir nia fatin,” nia afirma.

Iha tinan fiskál 2021 konstrui ona unidade 150 iha munisípiu Bobonaro no faze daruak 2022 ne’e konstrui UKL hamutuk unidade 459 sei implementa iha suku 50 mai hosi postu administrativu Atabae, Balibo, Cailaco, Maliana, Bobonaro no Lolotoe.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here