Ekipa CVTL halo fumigasaun ba atuasaun kazu dengue iha bairo Kampu Paru Dili, loron sabadu (22/01). Imajen Tatoli/Francisco Sony

DILI, 17 maiu 2022 (TATOLI)— Organizasaun Mundiál Saúde (OMS), tersa ne’e, apoia tan reajente teste dengue ka dengue teste kits hamutuk 40.000 no mákina fumigasaun 10 ba Ministériu Saúde (MS) atu halo prevensaun surtu dengue iha Timor Leste.

“Ohin loron, ita hetan tan apoiu reajente teste dengue ka dengue teste kits purvolta 40.000 nomós mákina fumigasaun hamutuk 10 hosi Organizasaun Saúde Mundiál,” Diretora Jerál Prestasaun Saúde iha Ministériu Saúde, Odete da Silva Viegas, hateten ba jornalista sira iha SAMES, kampu-Alor.

OMS konsege apoia ona reajente teset dengue hamutuk 50.000 hodi bele responde ka prevene surtu dengue iha Timor-Leste.

Organizasaun Mundiál Saúde (OMS) entrega reajente teste dengue hamutuk 40.000 no mákina fumigasaun 10 ba Ministériu Saúde (MS).Imajen/espesial

“Ita haree kazu dengue ho númeru ne’ebé mak sa’e makaas, maibé too agora númeru dengue redúz ona tanba kazu kumulativu dengue hamutuk 4.814, hosi númeru ne’e óbitu too ohin loron na’in-54, maioria labarik,” nia afirma.

Iha biban hanesan, Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins, informa atividade apoia reajente teste dengue ne’e hanesan kompromisu prevensaun dengue hosi Organizasaun Mundiál Saúde (OMS).

“Ohin, ita hetan fila-fali apoia dengue teste kits hamutuk 40.000 no ami la’ós depedénsia ba apoia sira ne’e, maibé  ita-nia  ekipamentu regular sira ne’e mós  tama daudaun ona  tanba ita haree kazu dengue  komesa mosu fali, nune’e ita tenke halo preparasaun estoke atu prevene dengue iha  fulan outubru no novembru,” nia akresenta.

Dengue hamate labarik na’in-54

Tuir dadus hosi Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru to’o horisehik pasiente dengue sa’e ba 4.814 no hamate labarik na’in-54.

Maioria kazu ne’e deteta husi Munisípiu Dili ho totál 3.329, Baucau 306, Manatuto 173, Covalima 146, Ermera ho kazu 118, Manufahi 190, Viqueque 79, Ainaro 45, Liquiça 126, Aileu 87 no Bobonaro 56, Lautem 155, no RAEOA na’in-neen.

Munisípiu Dili nafatin rejista kazu ne’ebe aas ho totál kazu 3.329, kompostu hosi postu administrativu Dom-Alexo 1.992, Cristo-Rei 501, Vera-Cruz 360 no Nain-Feto 404.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 576, Klínika Fatumeta 290, sentru saúde Comoro 1245 sentru saúde Vera-Cruz 236, sentru saúde Formoza 601, sentru saúde Becora 256 Klínika Madre Eliza na’in-ida, Sentru Saúde Atauro 11, Sentru Saúde Metinaro 46, Klínika Bairru-Pité 59, Klínika Motael na’in-rua no Klínika Moris Foun na’in-ida.

Apela ba populasaun

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e,liman-ain no sikun moras hodi bele hetan atendimentu hosi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante:   MS: pasiente dengue na’in-4.733 konsege rekuperadu

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here