Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 17 maiu 2022 (TATOLI)—Prosesu konstrusaun Sidade Universidade Aileu daudaun ne’e iha prosesu estudu viabilidade nia laran no prepara hela Bill of Quantity (BoQ).

“Daudaun ita sei prepara hela BoQ, ne’ebé inísiu jullu tinan ne’e sei finaliza, hafoin Ministériu Ensinu Superior Siénsia no Kultura (MESSK) hamutuk ho Minitériu Obra Públika (MOP) no kompañia manán-na’in sei aprezenta hafoin bele hahú ona konstrusaun morru,” Ministru Ensinu Superior Siénsia no Kultura, Longuinhos dos Santos, iha salaun Delta Nova, tersa ne’e.

Daudaun MESSK halo hela prosesu finál dezeñu morru, tanba antes ne’e termu referénsia ne’ebé iha la sita konstrusaun morru Sidade Universidade Aileu, tanba ne’e maka ministériu buka meiu hodi hahú filafali prosesu.

“Kona-ba konstrusaun morru, ita seidauk loke konkursu ne’ebé buat hotu sei iha hela prosesu nia laran,” nia akresenta.

Notísia relevante: MESSK prepara indemniza abitante afetadu sidade universitáriu Aileu

Maski nune’e, MESSK sei hamutuk ho MOP no kompañia manan-na’in, Barnaba halo ona aprezentasaun hafoin bele hahú konstrusaun ba morru Sidade Universidade Aileu.

Iha sorin seluk, governante ne’e informa, prosesu konstrusaun edifísiu Institutu Politékniku Betano (IPB) hahú daudaun.

“Kompañia ne’ebé sai manán-na’in iha ona, maibé MESSK seidauk bele públika naran tanba seidauk iha aseitasaun, bainhira prosesu hotu ona foin bele fó sai ba públika. Ha’u seidauk asina karta aseitasaun tanba sei iha hela faze analiza, karta ne’ebé Komisaun Nasionál Aprovizionamentu (CNA, sigla portugés) haruka mai ministériu. Ha’u sei haruka ekipa tékniku jurídiku sira sei halo analiza hamutuk, kuandu loos ona maka ha’u foin asina,” nia akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here