Osan dolar Amérika. Imajen/Espesiál

DILI, 17 maiu 2022 (TATOLI)–Vise Primeiru-Ministrauno Ministra Solidariedade Sosiál no Inkluzaun (MSSI), Armanda Berta, aprezenta projetu dekretu-lei iha reuniaun Konsellu Ministru (KM) estraordinária, tersa, ne’ebé hetan ona aprovasaun.

Projetu dekretu-lei ne’e kona-ba alterasaun datoluk ba dekretu-lei númeru 55/2020, loron 28 outubru, ne’ebé aprova konstituisaun Fundu Rezerva Seguransa Sosiál no definisaun ba modelu jestaun.

“Alterasaun ne’e define konseitu jestaun operasionál no permite katak Fundu Rezerva Seguransa Sosiál diretamente ka liuhosi Banku Sentrál Timor-Leste (BCTL, sigla portugés) ka entidade públika seluk, ne’ebé responsável ba jestaun operasionál, bele uza kontratasaun ka sub-kontrasaun hosi entidade sira seluk hodi asume funsaun espesífika balun ne’ebé inklui iha jestaun operasionál fundu nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: INSS seidauk implementa fundu rezerva seguransa sosiál

 Portavóz Governu, dehan, aleinde ho alterasaun ne’e, ativu sira ne’ebé sei integra iha karteira Fundu Rezerva Seguransa Sosiál nian tenki emite hosi entidade sira ne’ebé la aprezenta risku substansiál inkumprimentu, atu garante seguransa ba fundu ne’e rasik, ho masimizasaun rendimentu no minimizasaun risku.

Fundu Rezerva Seguransa Sosiál administra no jere tuir rejime kapitalizasaun públika hosi estabilizasaun, hakruk ba kritériu seguransa rentabilidade no likidéz, ho kuidadu no tuir prinsípiu boa-governasaun hodi benefisia kontribuinte rejime kontributivu seguransa sosiál.

Iha tinan 2020, Institutu Nasionál Seguransa Sosiál (INSS) rejista funsionáriu públiku no traballadór setór privadu pur volta 100.000.

Dekretu-lei númeru 47 mensiona katak kontribui ba seguransa sosiál ne’e hamutuk 10%, ne’ebé kompostu hosi 4% maihosi traballadór no 6% maihosi empregadór.

Nune’e, bainhira kada fulan simu saláriu, seguransa sosiál sei ko’a osan 4% hosi traballadór no 6% kontribui hosi empregadór.

Iha fulan ikus 2020, INSS rekolla ona kontribuisaun seguransa sosiál hamutuk millaun $93, ho previzaun daudaun atinje to’o millaun $100 resin.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here