Governu no empreza hatuur fatuk dahuluk monstrusaun Marina Square Dili, iha antiga rezidénsia saudozu Xavier do Amaral, Lecidere. tersa (30/03). Imajen Tatoli/Egas Cristóvão

DILI, 17 maiu 2022 (TATOLI)—Primeiru-Ministru (PM), Taur Matan Ruak, hamutuk ho Ministru Koordenadór Asuntu Ekonómiku, Joaquim Amaral no reprezentante empreza Timor Marina Square, S.A, Diretór Ezekutivu empreza A-Smart Holdings Ltd, Liam Huan Chiang, tersa ne’e, hatuur fatuk dahuluk projetu konstrusaun Marina Square Dili.

Área konstrusaun lokaliza iha antiga rezidénsia saudozu Francisco Xavier do Amaral, Bidau Lecidere.

“Konstrusaun ne’e konkretiza prioridade nasaun iha prátika no iha posibilidade kumpre objetivu nasionál, ho projetu privadu ne’ebé finansia hosi fundu internasionál, posibilita aparesimentu operadór ekonómiku foun ida iha setór turizmu,” PM hateten iha ámbitu serimónia.

Notísia relevante: Governu rona aprezentasaun planu mestre Lagoa Maubara no Marina Square

Empreza Timor Marina Square, S.A hanesan responsável projetu, orijen hosi nasaun Singapura, ne’ebé tau prioridade investimentu iha setór turizmu, hodi realiza investimentu iha Lecidere ho nia kapitál investimentu millaun $50, no iha faze inísiu sei emprega traballadór timór-oan hamutuk 420.

Primeiru-Ministru, Taur Matan Ruak no Diretór Ezekutivu empreza A-Smart Holdings Ltd, Liam Huan Chiang, iha serimónia hatuur fatuk dahuluk monstrusaun Marina Square Dili, iha antiga rezidénsia saudozu Xavier do Amaral, Lecidere. tersa (30/03). Imajen Tatoli/Egas Cristóvão

Ba inisiativa ne’e, Xefe Governu konsidera, lansamentu ne’e marka inísiu prosesu reabilitasaun urbana ne’ebé sei hala’o iha área importante hanesan Largo Lecidere, ho infraestrutura foun no moderna, efisiente no sustentável iha nível ekonómiku no ambientál, ne’ebé sei disponibiliza la’ós ba de’it servisu foun ba sidadaun, turista, investidór no emprezáriu sira ne’ebé vizita, liuhosi otél, restaurante, estabelesimentu komersiál no apartamentu sira, maibé mós oferta oteleira nasaun di’ak no kualidade servisu sira ne’ebé fó ba utente sira.

Primeiru-Ministru, Taur Matan Ruak. Imajen Tatoli/Egas Cristóvão

Tuir Xefe Ezekutivu, projetu ne’e marka ritmu kreximentu no progresu ne’ebé Governu dezeja ba nasaun, ho inovasaun, kriatividade, empreendedorizmu privadu barak liu, hodi estimula aparesimentu jerasaun traballadór foun ne’ebé kualifikadu no operadór ekonómiku sira.

“Investimentu ne’e kontribui duni ba objetivu boot Governu no ne’ebé ezije hosi ita-nia sidadaun, liuliu joven sira ne’ebé buka oportunidade foun kona-ba formasaun no empregu, ne’ebé bele hasa’e ninia abilitasaun no kompeténsia sira, inklui fonte rendimentu, moris di’ak no kualidade moris,” PM akresenta,

Governu no empreza hatuur fatuk dahuluk monstrusaun Marina Square Dili, iha antiga rezidénsia saudozu Xavier do Amaral, Lecidere. tersa (30/03). Imajen Tatoli/Egas Cristóvão

Projetu ne’e, sei kria empregu 170 imediatu diretu no bainhira realiza obra konstrusaun durante faze operasionál sei kria empregu 250 ne’ebé liga diretamente ba projetu.

Aleinde ne’e, sei loke oportunidade empregu foun no negósiu sira, hodi hamosu vaga servisu iha transporte, komérsiu, lojístika no servisu tékniku-finanseiru sira.

Nune’e mós, iha mós oportunidade foun ba formasaun no kapasitasaun institusionál, ne’ebé hodi uza prátika ne’ebé di’ak liu ba atendimentu no servisu internasionál, sei hasa’e padraun no nível kualidade iha oferta indústria oteleira Timor-Leste.

Biban ne’e, Xefe Governu agradese ba Reprezentante Empreza Timor Marina Square tanba halo ona investimentu iha Timor-Leste no kontinua servisu hamutuk hodi konkretiza projetu ne’e no projetu investimentu seluk.

Reprezentante empreza Timor Marina Square, S.A, Diretór Ezekutivu empreza A-Smart Holdings Ltd, Liam Huan Chiang. Imajen Tatoli/Egas Cristóvão

Iha biban hanesan, Diretór Ezekutivu empreza A-Smart Holdings Ltd, Liam Huan Chiang, apresia ho kolaborasaun Governu tanba fasilita ona prosesu.

“Agradese ba Governu Timor-Leste tanba konsege fasilita prosesu hotu bele la’o di’ak to’o ohin loron no bele realiza lansamentu ida-ne’e. Timor-Leste iha nia beleza rasik, riku ho istória no partimóniu kulturál, no importante liu populasaun Timor-Leste mesak ema ne’ebé serbisu maka’as,” Liam Huan dehan.

Nia konsidera mós Timor-Leste iha poténsia ne’ebé signifikadu, tanba ne’e sai razaun ba empreza hodi bele halo investimentu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here