Osan Dollar Amerikanu. Imajen/Espesiál

DILI, 17 maiu 2022 (TATOLI)–Governu liuhosi reuniaun Konsellu Ministru (KM) estraordinária, tersa ne’e, aprova projetu dekretu-lei, ne’ebé aprezenta hosi Primeiru-Ministru, Taur Matan Ruak, kona-ba regulamentu ba fundu kombatente libertasaun nasionál.

“Diploma ne’e sei regula fundu kombatente libertasaun nasionál no estabelese modelu investimentu osan fundu nian, ho objetivu atu hetan rendimentu no asegura ninia permanénsia,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniuan ezekutivu iha Palásiu Governu.

Portavóz Governu, informa, fundu ne’e, sei iha dotasaun inisiál biliaun $1 no sei sai hanesan fundu autónomu ne’ebé iha ninia autonomia administrativa, finanseira no patrimoniál.

Notísia relevante: Fundu veteranu gasta hosi retornu investimentu

Nune’e, objetivu hosi fundu ne’e mak atu finasia programa apoiu ba kombatente libertasaun nasionál, liuliu iha área apoiu sosiál, edukasaun, saúde, empregu, asesu ba kréditu no atividade ne’ebé hetan rendimentu.

“Fundu ne’e sai mós responsável hosi pagamentu prestasaun pekuniária únika ne’ebé prevee iha estatutu kombatente libertasaun nasionál,” Ministru akresenta.

Antes ne’e, liuhosi reuniauna KM, Governu aprova dekretu-lei númeru 8/2020 alterasaun daneen ba dekretu-lei númeru 15/2008 04 juñu, kona-ba pensaun kombatente no martires libertasaun nasionál, promulgadu hosi Prezidente Repúblika iha 19 marsu 2020.

Nune’e, liuhosi despaixu númeru 01/MACLN-SEACLN/I/2020, Governu kria Gabinete Apoiu Programa Fundu Investimentu Veteranu Timor-Leste, hodi tau-matan ba fundu investimentu veteranu.

Programa fundu investimentu veteranu ne’e implemetan iha fulan janeru 2020, kada fulan ko’a osan pensaun $30 hosi kada veteranu.

To’o abril 2022, fundu kontributivu ne’e akumula ona osan millaun $22 hosi veteranu hamutuk 27.828, ho funan $300.000.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here