Plantasaun Kafé iha munsípiu Ainaro, domingu (15/05). Imajen Tatoli/Francisco Sony

DILI, 17 maiu 2022 (TATOLI)–Primeiru-Ministru (PM), Taur Matan Ruak, aprezenta projetu dekretu-lei, iha reuniaun Konsellu Ministru (KM) estraordinária, tersa ne’e, kona-ba estabelese programa estimulu renovasaun no espansaun área plantasaun kafé.

“Projetu dekretu-lei ne’e hakarak estimula renovasaun plantasaun kafé atu haluan área plantasaun no aumenta produsaun anuál kafé inklui hasa’e rendimentu agrikultór sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: Governu iha asaun rua hasa’e produsaun kafé

Tuir Portavóz Governu, inisiativa ne’e mosu tanba Governu konsidera importánsia agrikultura, liuliu kafé, nune’e atu hadi’a kondisaun moris timor-oan no dezenvolvimentu ekonómiku país.

Nune’e mós, importante atu apoiu produsaun no promosaun kafé orgániku ho kualidade a’as no hadi’a produsaun kafé liuhosi reabilitasaun plantasaun, tanba ne’e Governu deside estabelese programa apoiu.

Apoiu sira hanesan subsídiu atu apoia renovasaun ka expansaun plantasaun kafé, ho valór $340 ba kada ektare plantasaun kafé, ne’ebé halo atividade kuda foun ka renova plantasaun.

Alende ne’e, apoia subsídiu ba plantasaun no tratamentu ba ai-horis protesaun ka apoia ba planta kafé sira iha kafé-laran, ho valór $0,,21 ba kada ai-horis ne’ebé kuda.

Estabelese programa apoia plantasaun ai-parapa

Iha biban ne’e, Governu aprova projetu dekretu-lei ne’ebé estabelese programa apoiu ba plantasaun ai-parapa sira iha tasi ninin no aprova regra ezekusaun sira.

Programa ne’e mai ho objetivu atu estimula kriasaun viveiru, haluan área plantasaun ai-parapa, kombate erozaun iha tasi, hodi hadi’a pozisaun Timor-Leste iha merkadu internasionál karbonu nia no nu’udár destinu turístiku.

Apoiu ne’e sei konkretiza liuhosi atribuisaun subvensaun públika ida ho valór hamutuk $0,50 ba kada ai-parapa ne’ebé kria viveiru ka kuda.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here