Diretór Ezekutivu FDCH, Cristóvão dos Reis. Imajen Tatoli/Francisco Sony

DILI, 17 maiu 2022 (TATOLI)–Bolseiru na’in-78 kompostu hosi dosente 48 no méritu 30 ne’ebé pasa ona iha selesaun sei partisipa kursu preparasaun durante fulan-tolu molok dezloka ba Portugal no Brazil hodi hala’o estudu hosi nível lisensiatura, mestradu no doutoramentu.

“Objetivu prinsipál ba kursu preparasaun ne’e atu dezenvolve kapasidade partisipante utiliza lian portugés iha kontestu akadémiku iha produsaun orál, hakerek sientífiku inklui dezenvolve kompeténsia pedagojia atu aumenta koñesimentu partisipante kona-ba área siénsia naturál no kompeténsia transversál hanesan kompeténsia ba jestaun projetu, kompeténsia ba servisu ekipa no kompeténsia komunikasaun,” Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, informa iha salaun Delta Nova, tersa ne’e.

Notísia relevante: Bolseiru Bolsa Hakbiit 480 asina termu kontratu eskola iha UNTL

Durante faze inskrisaun, kandidatu bolsa dosente 74 maka submete aplikasaun, kompostu hosi dosente iha universidade no Instituisaun Ensinu Superior privadu 12 iha rai-laran.

“Maibé to’o iha selesaun finál, dosente ne’ebé pasa 48, ne’ebé sira ne’e mak sei halo estudu iha nível mestradu no doutoramentu iha area oin-oin,” nia akresenta.

Hosi bolsa méritu, kandidatu ne’ebé submete aplikasaun hamutuk 573, ba nível lisensiatura 529 no nível mestradu 44, maibé to’o iha selesaun finál sira ne’ebé hatama aplikasaun na’in-30 mak pasa, enkuantu na’in-lima sei hala’o estudu iha nível mestradu no na’in-25 iha nível lisensiatura.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here