Inspetór Gabinete Inspesaun Gerál Auditoria Ministeriu Justisa, Lucas António da Costa, preside konferensia imprensa, hodi ko'alia ba midia, kona-ba tuir planu GIA/MJ ne'ebé aban, sei halo inspesaun ba arredatáriu sira ne'ebe la kumpri sira nia dever selu kontratu areendamentu ba Estadu. imaje/Natalino Costa.

DILI, 17 maiu 2022 (TATOLI)— Ministériu Justisa (MJ) liuhosi Gabinete Inspesaun Auditória (GIA), kuarta (18/5), hahú halo inspesaun ba kompañia sira ne’ebé maka ladauk kumpre sira nia devér atu selu arrendamentu rai no uma ba Estadu, nune’e ba oin kompañia sira bele selu arrendamentu ba Estadu.

Inspesaun  hosi GIA ho bazeia  ba  dekretu-lei númeru 19/2004, loron 29 dezembru, kona-ba rejime jurídiku bens no imóveis. Afestasaun ofisiál no arrendamentu bens no imóveis dominu privadu do Estadu. No bazeia mós bá depaixu hosi Ministru Justisa númeru 31/2022, loron 13, maiu, kona-ba identifikasaun no kontrolu ba kontratu arrendamentu rai no uma estadu nian iha kapitál Dili.

“Importante maka atu regulariza no husu ita-nia sidadaun liuliu ba arredatáriu sira ne’ebé maka la selu renda tuir kontratu arrendamentu ho Estadu  atu kumpre sira nia devér no obrigasaun tuir lei ne’ebé maka vigór hodi kontribui reseita ba Estadu,” Inspetór Gabinete Auditoria (GIA), hosi Ministériu  Jusitisa (MJ), Lucas António da Costa  hateten liuhosi Konferénsia Imprensa ba iha Ministeriu Justisa-Caicoli, tersa ne’e.

Notísia relevante: Durante mandatu, MJ promete obriga investidór sira kumpre akordu arrendamentu

Tuir relatóriu hosi Diresaun Jerál Terras no Propriadade liuhosi atendimentu ba kontratu arrendamentu nian katak, reseita arrendamentu hosi areedatáriu sira iha tinan 2022 ne’e ladun iha mudansa ne’ebé signifikativu.

Tanba, Inspestór GIA ne’e dehan iha kondisaun rua maka halo situasaun sira ne’e akontese, hanesan haree ba termu kontratu arrendamentu mate, areendatáriu sira tenke ba  halo renovasaun iha Diresaun Jerál Terras no Propriadade, maibé arredatáriiu sira kontinua aproveita rai no uma Estadu halo atividade ekonómiku.

Iha situasaun seluk mak arrendatáriu balun simu ona karta notifikasaun hosi DNTP, maibé sira la kumpre notifikasaun refere, sira uza nafatin rai no uma Estadu ba atividade komérsiu, negósiu no atividade sira seluk. 

“Kondisaun hirak ne’e maka sai nuudar razaun no kauza ba ekipa GIA tun direita iha terreñu hodi hala’o identifikasaun, inspesaun no kontrolu ba kontratu areendamentu rai no uma Estadu nian iha kapitál Dili, nune’e arrendatáriu sira bele kumpre sira nia devér no obrigasaun selu arrendamentu ba Estadu nuudar parte ida kontribuisaun ba dezemvolvimentu ekonomia no sosiu iha rai doben Timor-Leste,” Lucas hateten.

Iha inspesaun ne’e, ekipa GIA sei foti dadus hosi arrendatóriu sira ne’ebé la selu arrendamentu tuir kontratu arrendamentu ho Estadu atu informasaun hirak ne’e sei hato’o liu hosi relatóriu ba Ministru Justisa hodi foti medida hasoru kompañia sira.

Maske, MJ halo ona konvokatóriu ho kompañia 83 hodi simu esplikasaun, nune’e kumpre sira nia devér selu arrendamentu, maibé balun la kumpre.

“Iha kompañia estrajeiru no nasionál hamutuk 83 maka mai reuniaun ho Ministru Justisa, hafoin reuniaun iha kompañia rua maka selu ona sira nia divida arrendamentu, maibé iha  kompañia 81 mak seidauk kumpre, tanba ne’e ami presiza tuun ba tereñu direita hodi  ko’alia ho sira,” nia afirma.

Notísia relevante:Selu arrendamentu, Governu halo diskusaun ho kompañia 82

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here