Progresu konstrusaun Eskola EBF Ularik, iha Bibileo, Viqueque, segunda (16/05). Imajen Tatoli/Vitorino Lopes da Costa

VIQUEQUE, 16 maiu 2022 (TATOLI)—Vise-Ministru Edukasaun Juventude no Desportu (MEJD), António Guterres, husu grupu komunitáriu responsável ba konstrusaun eskola 18 iha munisípiu Viqueque atu aselera konstrusaun infraestrutura eskola, liuhosi projetu komunitáriu.

“Ha’u husu grupu komunitáriu ne’ebé halo konstrusaun eskola 18 iha munisípiu Viqueque, tenki aproveita hodi aselera servisu, tanba tempu agora udan ladún tuun. Bainhira udan mai tan susar atu finaliza konstrusaun. Tanba ne’e, ha’u husu grupu sira aselera serbisu, nune’e bainhira tama ba fulan-setembru tenke inaugura ona,” Vise-Ministru hateten ba Agência Tatoli, hafoin ramata halo inspesaun ba konstrusaun Eskola Ensinu Báziku Filiál (EBF), Ularik, iha Bibileo, segunda ne’e.

Notísia relevante: Konstrusaun eskola 18 iha Viqueque hahú fevereiru

Governante ne’e nota daudaun konstrusaun eskola paradu hela tanba ne’e husu grupu komunitáriu atu responsabiliza serbisu.

“Problema seluk hosi grupu sira katak tékniku edukasaun destakadu iha munisípiu Viqueque ladún akomapaña, nune’e ha’u kontaktu ona tékniku hodi mai akompaña konstrusaun. Karik iha serbisu ladún kolabora hamutuk, tenki halo esforsu hodi aselera konstrusaun ne’e,” nia akresenta.

Iha fatin hanesan, Prezidente responsável grupu komunitáriu, Ezaqiuel Guterres Gomes, hateten, grupu sira mobiliza materiál konstrusaun hodi aselera konstrusaun.

“Aban ne’e ami hahú halo serbisu hodi hatama rai mutin hodi  aterru. Ami promete sei aselera serbisu ne’e ho di’ak. Progresu konstrusaun EBF Ularik foin atinje 25%, pondasi uma no sinta ramata ona hein kontinuasaun hada batako ba leten,” nia dehan.

Konstrusaun edifísiu EBF Ularik ho kustu $70.633,26, ne’ebé projetu ne’e hahú iha loron 03 fevereiru 2022 no sei ramata iha agustu 2022, maibé implementasaun serbisu tarde.

EBF Ularik lokaliza iha suku Bibileo, postu administrativu Viqueque vila, munisípiu Viqueque,  ho némeru estudante 300 resin. 

Jornalista : Vitorino Lopes da Costa

Editora     : Julia Chatarina  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here