Vise-Ministru Agrikultura no Peskas, Abilio Xavier de Araújo. Imajen Tatoli/Francisco Sony.

BOBONARO, 16 maiu 2022 (TATOLI) – Vise Ministru Agrikultura no Peska (MAP), Abílio Xiver de Araújo, sei prezide serimónia hasa’e bandeira nasionál iha  komemorasaun restaurasaun independénsia 20 maiu ba dala-XX iha munisípiu Bobonaro, ne’ebé sei realiza iha kampu futeból Maliana.

“Ami simu karta hosi nasionál katak, ita-nia Vise-Ministru Ministru Agrikultura mak sei sai inspetór serimónia hasa’e bandeira  20 de maiu iha munisípiu Bobonaro,” Prezidente Komisaun organizadora, João Fátima do Carmo, informa ba Tatoli, iha kna’ar-fatin, Maliana, segunda ne’e.

Nia relata, daudaun ne’e preparasaun ba loron importante ne’e atinje ona 80%, tanba formasaun parada ba estudante sira mós iha progresu di’ak.

Tanba ne’e autoridade munisípiu ne’e apela ba administradór postu administradór sira, liuliu Maliana atu orienta xefe suku sira mobiliza komunidade sira partisipa iha selebrasaun loron importante ne’e.

“Importante loos komunidade sira partisipa iha serimónia ne’e, tanba festa ne’e povu hotu nian, no loron ne’e importante ba povu hotu atu selebra hamutuk hodi fó onra ba ita-nia eroi sira-nia sakrifísiu luta ba ukun rasik-aan,” nia afirma.

Tuir palnu hosi komisaun organidora katak, komemorasaun tinan ne’e sei realiza atividade sira hanesan, feira produtu lokál, jogu tradisionál futu-manu no jogu bola guling.

Nune’e mós sei iha kompetisaun sae-bua no animasaun drum band ne’ebé sei demostra hosi Estudante Tékniku Vokasionál (TEKVOC) númeru II Malibaka, Yamato, Maliana.

Entretantu orsamentu ne’ebé autoridade munisípiu Bobonaro prevee ba komemorasaun 20 maiu tinan ne’e totál $ 17,640,5. Hosi montante ne’e aloka ba seksaun 11, postu administrativu sira sei hetan rihun $1 no kada suku hetan $75.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here