Edifísiu UNPAZ iha Ai-mutin. Imajen Tatoli/Egas Cristóvão

DILI, 16 maiu 2022 (TATOLI)—Universidade da Paz (UNPAZ) no Institute of Business (IOB) la konsege ezekuta hotu inzensaun propina, ne’ebé antes ne’e Ministériu Ensinu Superior Siénsia no Kultura (MESSK) prevee ona ho montante $1.771.415.

“Ita la konsege ezekuta hotu tanba estudante iha barak mak la mai halo konfirmasaun,” Reitór UNPAZ, Adolmando Amaral, informa iha ninia knaar fatin, Ai-mutin ba Agência Tatoli, segunda ne’e.

Antes ne’e, Instituisaun Ensinu Superiór Privadu (IESP) submete ona relatóriu prelimináriu ezekusaun inzensaun propina faze dahuluk ba MESSK, maibé la konsege ezekuta 100%.

“Agora ministériu sei haree relatóriu, hafoin atu konfirma buat ruma ami sei halo filafali verifikasaun ba estudante sira,” nia akresenta.

Totál orsamentu ne’ebé UNPAZ simu hosi MESSK hamutuk $1.152.835, hodi fó inzensaun propina ba estudante 9.167, ne’ebé konsege ezekuta 86%, ba estudante 7.000 resin.

“Ami sei asegura hela metade, nune’e 3% hosi subsídiu ne’ebé iha bele kontinua hein estudante sira ne’ebé seidauk hetan subsídiu atu mai halo konfirmasaun. maibé to’o loron termina maka sira la mai konfirma, universidade mak sei devolve fali osan sira ne’e ba kofre Estadu.

“Osan sira ne’e universidade simu atu halo pagamentu ba estudante sira inklui sira ne’ebé gradua iha tinan kotuk. Tanba ne’e, ita husu ba ministériu atu fó tan tempu buka tuir estudante sira ninia paradeiru hodi konfirma mai foti sira-nia direitu,” nia tenik.

Nune’e mós, Reitór IOB, Pedro Ximenes, dehan, sira-nia parte aprezenta ona relatóriu ba ministériu, relasiona pagamentu subsídiu propina ba estudante sira, maibé agora sira hein de’it Inspetór Jerál MESSK ninia auditóriu ba relatóriu ne’ebé maka submete ona.

Notísia relevante: Inspesaun Jerál MESSK nota inzensaun propina estudante 66.106 la’o di’ak

IOB antes ne’e hetan transferénsia orsamentu hosi Governu hamutuk $618.580 hodi halo inzensaun propina ba estudante hamutuk 4.361 maibé estudante barak mak la mai halo konfirmasaun to’o ohin loron.

“Ami onestu de’it, pagamentu subsídiu propina ba estudante ami la konsege ezekuta to’o ramata, ami konsege ezekuta de’it 79%, ne’ebé kuandu la ezekuta hotu tenke devolve filafali ba kofre Estadu,” nia tenik.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here