Timor Leste-Austrália lansa polítika hadorsa sistema saúde primária ba munisípiu tolu. Lansamentu ne’e hala’o iha RAEOA. Imajen Tatoli/Abílio Elo Nini.

OÉ-CUSSE, 16 maiu 2022 (TATOLI) – Governu Timor-Leste liuhosi Ministériu Saúde (MS) hamutuk ho embaixada Austrália, segunda ne’e lansa programa haforsa sistema saúde kuidadu saúde primária atu implementa iha munisípiu tolu iha Rejiaun Administrasaun Espesiál Oé-Cusse Ambeno (RAEOA) ba períodu tinan lima nian.

Prioridade polítika ne’e realiza hosi parseriu Ministériu Saúde ho Austrálian Department of Foreign Affairs and Trade (DFAT), ba munisípiu tolu, Ermera, Dili no RAEOA ho kompromisu hadi’a implementasaun polítika finansiamentu bazea dezempeñu no sistema informasaun saúde.

Nune’e mós iha nível munisípiu, sei apoia haforsa lideransa, sistema jestaun, kapasidade rekursu umanu no kolaborasaun inter-setorál atu fortalese implementasaun kuidadu saúde primária no kualidade prestasaun serbisu ho efetivu.

Iha nivél fasilidade saúde, sei apoia atu haforsa lideransa, aumenta rekursu no kapasidade atu presta serbisu ne’ebé kualidade no asesive no divulga ba populasaun iha área kobertura.

Nomoos integra aspetu jéneru, defisiénsia iha programa no atividade hotu, iha flexibilidade atu adapta no responde na apoia sira-ne’ebé krítiku bazea aprendizajen no nesesidade.

Nune’e Ministra Saúde, Odete Maria Freitas Belo, apresia ho parseiru ne’e nune’e hasa’e progresu di’ak iha setór saúde, atu mellora dezempeñu prestasaun serbisu iha kuidadu saúde primária.

“Parseiru ida-ne’e Ministériu Saúde hahú revee nia Planu Estratéjiku Nasionál iha setór saúde, no polítika ba prestasaun asisténsia saúde iha nível kuidadu saúde primária, hanesan pakote serbisu esensiál ba kuidadu saúde primária, ha’u espera iha tempu badak, ita sei lansa pakote esensiál kuidadu saúde primária nian, ” Ministra Odete ko’alia iha serimónia lansamentu iha Otél Ambeno.

Governante ne’e kompromete, sei aprosima no organiza prestasaun kuidadu saúde primária ho integradu, nune’e bele jere no utiliza didi’ak tuir rekursu ne’ebé koloka ona ho efisiente, hodi bele atinje rezultadu di’ak, liuhosi muda ema-nia saúde ho di’ak liután.

Embaxadór Austrália ba Timor-Leste, Bill Catello, orgullu no kontinua apoia Timor-Leste iha setór saúde nian.

“Ami-nia esforsu foku liu iha nível fasilidade, ami-nia ekipa sei serbisu ho  Ministériu Saúde, servisu saúde munisípál no postu saúde sira, atu revee sistema no prosesu hodi tulun rezolve dezafiu sira-ne’ebé impede prestasaun servisu saúde ne’ebé kualidade,” nia katak.

“Iha tinan 20 liuba, ita-hotu servisu hamutuk, ita asiste melloramentu setór saúde ne’ebé impresivu tebes, servisu klíniku nian ne’ebé di’ak, no redus taxa mortalidade inan no oan sira, ami fiar katak apoiu hosi pakote foun ne’e, bele tulun Governu hodi presta servisu saúde nian ho di’akliu,” nia akresenta.

Austrália mós orgullu bele apoia Ministériu Saúde, Ministériu Sosiál Solidariedade no Inkluzaun nia programa Bolsa da Mãe jerasaun foun, ba transferénsia osan ba inan isin-rua no labarik sira, Oé-Cusse sai nu’udar munisípiu dahuluk ne’ebé  simu pagamentu ida-ne’e.

Jornalista   : Abílio Elo Nini

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here