RAEOA realiza feira produtu lokál komemora loron restaurasaun independénsia bad ala-XX. Imajen mídia ZEESM.

OÉ-CUSSE, 16 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno, (RAEOA), domingu ne’e abertura feira bazar kalan, atu promove produtu lokál hosi komunidade sira, hodi komemora loron restaurasaun independénsia 20 maiu ba dala-XX.

Feira produtu lokál ne’e, abertura direitamente hosi Prezidente Autoridade RAEOA, Arsénio Paixão Bano, durante loron 10 hahú domingu 15 to’o 25 maiu.

“Ohin kalan ita loke bazar kalan atu selebra loron reestaurasaun 20 maiu, ha’iha loron 10 nia laran, hot-hotu avontade ho ita-nia produtu lokál Oé-Cusse, ita tenke promove rasik nian saida mak ita iha, ema Oé-Cusse tenke gosta uluk nia produtu rasik, ” Arsénio Bano, ko’alia iha abertura bazar kalan realiza iha Palaban.

Nia informa, feira bazar kalan la’ós foin mak realiza maibé kada tinan, ativa atu anima komunidade hotu iha Oé-Cusse, balun mai hosi sub-rejiaun sira lori produtu oinoin hatudu iha feira ne’e.

Prezidente Komisaun Organizadora, Pedro da Cunha Boquifai atuál Sekretáriu Rejionál ba Asuntu Komérsiu no Indústria, informa, atividade ne’ebé ajenda iha feixa produtu lokál promove mós talentu foinsa’e no grupu feto potensiál liuhosi kompetisaun

“Ita prepara ona mak kompetisaun homan ba grupu homan-sira, kompetisaun transforma produtu lokál, kompetisaun diskursu ba asuntu meiu ambiente nian, jestaun lixu no protesaun ba bee-matan sira, kompetisaun solu fokál, nune’e bele anima komunidade-sira, jogu bola guling inklui atividade promosaun produtu orijinál Oe-Cusse nian,” nia katak.

Jornalista : Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here