Diretór PNDS Munisípiu Bobonaro, Paulino Viegas Tilman. Imajen Tatoli/Sérgio da Cruz.

BOBONARO, 16 maiu 2022 (TATOLI) — Diretór Programa Naionál Dezenvolvimentu  Suku (PNDS) Munisípiu Bobonaro, Paulino Viegas Tilman, fó-sai katak, implementasaun Uma Kbiit Laek (UKL) faze dahuluk tinan 2021 nian hamutuk unidade tolu iha suku Leo-lima, postu administrativu Balibo ninia progresu fíziku sei menus liu.

Nia haktuir, totál UKL 2021 iha munisípiu Bobonaro hamutuk unidade 150 no hosi númeru ne’e 53 mak atinje ona 100%, no  iha uma 94 mak sei iha hela prosesu konstrusaun ne’ebé ninia progresu fizíku atinje ona entre 50% to’o 90%.

“Hela de’it uma tolu mak ninia atinje progresu ne’e kiik liu entre 40% até 50% iha aldeia Bour, suku Leo-lima tanba fatin ne’ebé mak ita halo uma ba susar karreta tama, ita atu lori materiál ba tenke haku’ur mota, horibainhira udan-boot mota sobu hotu barajen entaun karreta susar atu ultrapasa, motorizada atu ultrapasa mós araska,” nia informa ba Tatoli, iha kna’ar-fatin, Maliana, segunda ne’e.

Nia akresenta, daudaun ne’e konstrusaun iha suku Leo-lima paradu hela, tanba ne’e sei buka alternativu ida hodi halo normalizasaun estrada refere.

Nune’e mós iha postu administrativu Cailaco, iha suku Meligo nian tanba aldeia alvu iha liu fuho tutun nune’e defisil fornesedór sira atu transporta materiál kontrusaun, no iha suku Da-udu mos komunidade sira foin hadi’a estrada nune’e tempu badak bele mobiliza sasán atubele kontinua konstrusaun.

Hosi parte parte suku Atudara mós uma unidade rua mak seidauk konklui tanba atu mobiliza materiál ba tenke haku’ur mota, tanba lokalizasaun fatin iha liu área rurál baliza kedas ho parte suku Marobo, postu administrativu Bobonaro.

Enkuantu iha postu administrativu Bobonaro mós antes ne’e estrada ida iha parte Tas-Bali kotu, suku Karabau mós kotu, susar tebes fornesedór sira mobiliza materiál, entaun fó impaktu ba konstrusaun iha suku Lour.

Maibé foin lalais ne’e parte PNDS deside hatama fali kuotasaun ba iha munisípiu Covalima nune’e fonese fali materiál hosi postu administrativu Zumalai mak foin hatudu progresu di’ak tanba besik ona atu konklui.

“Ha’u hakarak relata de’it persentajen totál munisípiu ninia iha ona 65% tanba uma 53 100% ona, balun 50% no 90%, balun besik atu hotu ona ,” nia hateten.

Purtantu tuir dateline projetu UKL 2021 sei termina iha fulan-maiu ne’e, maibé kondisaun terrenu seidauk permite.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here