Prezidente Repúblika, Francisco Guterres 'Lú-Olo'. Imajen TATOLI/António Gonçalves

DILI, 16 maiu 2022 (TATOLI)–Prezidente Repúblika, Francisco Guterres Lú Olo, kondekora veteranu hamutuk na’in 83 ho grau kolar orden Timor-Leste nu’udar rekuñesimentu no valorizasaun Estadu ba asaun patriotizmu no sira-nia dedikasaun ba rai Timor-Leste nia ukun rasik an.

Xefe Estadu ne’e hateten, ho onra no orgullu boot kondekora ba dala ikus liu ho naran Estadu Timor-Leste, veteranu luta libertasaun nasionál ne’ebé reziste entre tinan 15 no 19 liuhosi dalan oioin no ho ida-idak nia kbiit rasik hodi tane Timor-Leste nia mehi boot atu afirma-an iha mundu nu’udar nasaun no povu ida ho identidade rasik.

“Hamutuk hotu sobrevivente 66 no saudozu 17 mak simu rekoñesimentu no valorizasaun nu’udar erói no eroína nasionál iha loron ohin. Ho kondekorasaun ida-ne’e kombatente libertasaun nasionál luta armada–frente interna, rejistadu no validadu, ne’ebé tuir lei, klasifika nu’udar veteranu simu hotu ona rekoñesimentu no valorizasaun hosi Estadu Timor-Leste,” Xefe Estadu ne’e hateten iha nia diskursu iha salaun China, Palásiu Prezidensiál, Bairru Pite, segunda ne’e.

Di’ak tebes bainhira Estadu organiza aktu solene ida hodi rekoñese no valoriza kombatente libertasaun nasional liuhusi kondekorasaun kolar orden Timor-Leste ba veteranu/a sira.

Maibé Estadu fó mós protesaun ba sira-nia dependente sira, oan-ki’ak no faluk sira no rekoñesimentu no valorizasaun ba luta-na’in sira konsagra iha konstituisaun, nune’e Estadu hatene ninia obrigasaun hosi kedas loron Timor-Leste restaura indepedénsia nasionál iha 20 maiu 2002.

Artigu 11 Konstituisaun RDTL hateten, Estadu asegura protesaun espesiál ba mutilados de guerra, órfaun sira no dependente sira hosi luta-nain sira-ne’ebé fó sira-nia vida ba luta independénsia no soberania nasionál no proteje hotu-hotu ne’ebé partisipa iha rezisténsia.

Estadu nia apoiu ba kombatente libertasaun

PR Lú Olo, dehan to’o ohin loron Estadu nia apoiu ba kombatente libertasaun nasionál konkretiza liuhosi subvensaun públika ne’ebé fulan-fulan fahe ba kombatente libertasaun nasionál sobrevivente no família mártir sira-nian tuir validasaun ba ida-idak ninia partisipasaun iha luta libertasaun nasionál.

Harii jardin erói pátria fatin ida ne’ebé sai sentru permanente omenajen ba sira no ne’ebé tama ona iha roteiru turístiku-istóriku no edukativu ba vizitante sira no jerasaun hotu-hotu ohin loron no ba aban bainrua.

Estadu Timor-Leste fornese kaixaun no hakoi ita-nia eroi ho onra Estadu jardin erói pátria ka iha rate seluk tuir desizaun família nian.

Harii ekipa médika espesiál ida hodi tau matan ba saúde kombatente libertasaun nasionál no família sobrevivente no mártir sira-nian.

Fasilita asesu ba kréditu no fó ona subsídiu iha tinan 2020 no 2021 ba veteranu 20-24 hamutuk 116 hodi harii ka hadi’ak sira-nia uma.

Fó bolsa estudu ba kombatente no mártir nia oan sira liuhosi Ministériu Asuntu Kombatente Libertasaun Nasionál (MAKLN) hosi ensinu báziku to’o universitáriu.

Nia dehan, apoiu sira-ne’ebé Estadu fó ba luta-na’in sira to’o agora kobre ho osan ne’ebé tama iha Orsamentu Jerál Estadu tinan-tinan.

Xefe Estadu ne’e hateten, iha diskursu sira antes ne’e nia-parte halo apelu ba Governu no mós ba CCLN atu harii rasik fundu veteranu atu bele sustenta apoiu ba ita-nia luta-na’in sira no sira-nia família.

Tuir nia, iha inisiativa Sekretaria Estadu ba Asuntu Kombatente Libertasaun Nasionál, kombatente ida-idak deskonta daudaun ona $30,00 kada fulan, Estadu Timor-Leste tenke buka dalan di’akliu atu oinsá investe ho di’ak osan ne’ébé hasai husi fundu mina-rai atu bele kontinua tau matan nafatin ba kombatente libertasaun nasionál.

“Prezidente Repúblika simu ona dekretu ida hosi Parlamentu Nasionál ne’ebé aprova pedidu hosi Governu atu halo alterasaun ba Lei Orsamentu Jeral Estadu (OJE) 2022 ne’ebé prevee biliaun $1 atu harii fundu veteran,” nia hateten.

Prezidente Repúblika seidauk deside promulga ka veta diploma ne’e karik promulga, Governu mak sei haree, liuhosi dekretu-lei ida, sá modelu investimentu mak sei uza atu fó rendimentu boot no lalais liu ba fundu veteranu.

Tan ne’e, Estadu kumpre daudaun ninia dever atu rekoñese no valoriza kompatriota kombatente luta libertasaun nasionál.

Parte seluk, Prezidente Repúblika apela dala ita tan ba kombatente ida-idak no ba sidadaun hotu atu kaer metin nafatin onra no orgullu pertense ba povu ida no rai ida de’it Timor-Leste.

Ba segunda faze libertasaun nasionál halakon ki’ak no hatuur justisa sosiál, ita presiza tanen nafatin sentidu pertensa ida-ne’e.

“Ita ida-idak bele kontribui ba rai ida-ne’e nu’udar membru partidu politiku ka organizasaun sosiál ka relijioza nian ka ho kbiit rasik. Maibé ita labele lakon sentidu koletivu, katak saída de’it mak ita hanoin no halo di’ak la’ós hadi’ak de’it ita-nia vida maibé sei halo diferensa ba vida ema seluk nia família ida nian, komunidade no povu tomak nian,” nia dehan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here