Komandante PNTL Munisípiu Baucau, Superintendente António de Sá. Imajen Tatoli/Natalino Belo.

BAUCAU, 16 maiu 2022 (TATOLI) – Komandu Polísia Nasionál Timor-Leste (PNTL) munisípiu Baucau enkoraja membru grupu arte-marsiál sira atu kumpre doutrina organizasaun ho loloos nune’e kontribui ba pás no establidade iha rai-laran.

Komandante PNTL Baucau, Superintendente António de Sá hateten, objetivu tuir arte-marsiál atu hasa’e rezisténsia fíziku no mentalidade, la’ós treinu atu utiliza arma branka hodi kria konflitu no ikus tama kadeia no halakon oportunidade moris iha futuru nian.

“Ha’u hakarak enkoraja juventude sira, karik tuir arte-marisiál tenke kumpri regra no doutrina arte-marsiál nian tanba laiha arte-marsiál ida hanorin ema atu halo konflitu,” Komandante PNTL Baucau hateten iha Triloka, segunda ne’e.

Nia dehan, kualkér arte-marsiál hotu-hotu iha ne’ebé eziste iha mundu mai kedas ho ninia prinsípiu no doutrina katak atu hanorin ema hadi’a saúde fizikamente, moral liuliu kria pás no estabilidade nune’e kontribui ba dezenvolvementu nasaun nian.

Superintende António de Sá fó ezemplu, nasaun Korea no Xina maioria ninia sidadaun treinu arte-marsiál Tae-Kwon-Do no Kongfu maibé nunka kria konflitu tanba treinu atu defende-aan no komprende prinsípiu hosi arte-marsiál ne’e rasik.

Entertantu, Governu liuhosi Ministériu Justisa (MJ) legaliza ona atividade grupu arte marsiál tolu hanesan Persaudaraan Setia Hati Terate (PSHT), Ikatan Kera Sakti no Kmanek Oan Rai Klaran (KORK) ne’ebé publika ona iha Jornál Repúblika iha loron 26 fulan-abríl tinan 2022.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here