Deputadu KHUNTO, Luis Roberto. . Imajen/Doc. Tatoli.

DILI, 16 maiu 2022 (TATOLI)—Vise Prezidente Parlamentu Nasionál no Deputadu hosi Bankada KHUNTO, Luís Roberto, husu ba Komisaun A trata asuntu Justisa no Konstitusionál fó prioridade ba proposta alterasaun lei pensaun vitalísia (LPV) atu tau ba ajenda hodi halo diskusaun. 

Notísia Relevante:  2022: Komisaun A sei fó prioridade ba alterasaun lei Pensaun Vitalísia

Luis Roberto hateten, Partidu KHUNTO nia kompromisu iha Parlamentu Nasionál mak hakarak halo alterasaun ba proposta lei pensaun vitalisa hodi redús nia persentajen.

“Proposta ne’e to’o agora sei iha Komisaun A no seidauk tuur hamutuk foti desizaun ba diskusaun proposta alterasaun lei pensaun vitalisa, maibé ami KHUNTO prontu de’it submete atu halo alterasaun. Nu’udar bankada Governu no membru Komisaun A sei hato’o iha komisaun oinsá halo diskusaun,” Deputadu Luís Roberto hateten ba Agência Tatoli iha Parlamentu Nasionál, segunda ne’e.

Notísia Relevante: CNRT fó importánsia ba proposta alterasaun lei pensaun vitalísia atu debate

Antes ne’e, Governu liu hosi reuniaun Konsellu Ministru (KM) iha 19 fevereiru 2020 aprova ona proposta alterasaun dahuluk lei ba eis titulár sira, ne’ebé define kona-ba pensaun vitalísia.

Proposta ne’e prevee oinsá atu ajusta rejime pensaun vitalisa ba rejime seguransa sosiál, ne’ebé sei la elimina direitu ba ema ruma, liu-liu ba órgaun titulár sira no hafoin hetan aprovasaun hosi Konsellu Ministru mak Governu lori proposta ne’e ba Parlamentu Nasionál atu bele diskute.

Iha 04 maiu 2021, Komisaun A suspende proposta alterasaun ba lei estatutu remuneratóriu ba titulár kargu polítiku tanba sei hein Governu aprezenta regra aplikasaun.

Vise PN ne’e hateten, la’ós atu halakon maibé tenke redú nia persentajen hodi bele halo balansu tanba pensaun vitalísia prevee tiha ona iha konstituisaun, entaun atu halakon karik presiza konsensu entre partidu sira-ne’ebé hetan asentu iha parlamentár.

Maske partidu KHUNTO hola parte iha bankada Governu maibé presiza konsesu hosi partidu sira asentu Parlamentár.

“Fila-fali ba bankada boot iha konsesu, liu-liu partidu bo’ot Fretilin ho CNRT tanba sira mak númeru membru deputadu barak no ami KHUNTO prontu submete, tantu ida ne’e kompromisu hosi partidu ida-idak nian. Bainhira alterasaun ne’e halo mak sei halo poupansa ba Orsamentu Jerál Estadu (OJE0,” nia dehan.

Notísia Relevante: Kaleidoskópiu 2021: PN kontinua suspende proposta alterasaun lei pensaun vitalísia

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here