Xapa Matríkula Orijinál. Imajen/Natalino Costa.

DILI, 16 maiu 2022 (TATOLI)—Governu liuhosi Dirasaun Aprovizionamentu iha Ministériu Transporte no Komunikasaun (MTK), sei loke konkursu ba prodús xapa mátrikula orijinál hosi P 6001 to’o xapa mátrikula T.

“Xapa mátrikula ne’ebé foin daudaun kompañia sira hatama ne’e, projetu no orsamentu tinan 2021 nian. Ba tinan 2022, agora foin halo hela planu asaun, ne’ebé agora daudaun nia prosesu namanas hela iha aprovizionamentu halo konkursu ba kompañia se mak manán mak foin prodús tan xapa mátrikulamP 6001 to’o xapa mátrikula T,” Diretór Dirasaun Nasionál Transporte no Terrestre (DNTT), António da Costa, hateten ba Agência Tatoli, iha nia knar fatin, Díli, segunda ne’e.

Tuir nia, prosesu konkursu ne’e depende ba Dirasaun Aprovizionamentu, bainhira finaliza ona no sé mak sai vensedór entaun kompañia refere mak sei prodús xapa mátrikula refere.

“Tanba, foin dadaun motorista sira simu xapa mátrikula P to’o 6000 de’it maibé ba xapa mátrikula P 6001 ba leten ne’e seida’uk. Tanba ne’e, agora atu loke konkursu ba kompañia se mak manán foin prodús xapa mátrikula P 6001 ba leten, maibé xapa mátrikula O kompletu ona. Nune’e, ha’u husu ba maluk sira-ne’ebé nia plát O no P 6000 mai kraik bele mai foti ona tanba daudaun ne’e xapa mátrikula P 6000 mai kraik kompletu ona,” nia esplika.

Entretantu, tuir planu Dirasaun Nasionál Transporte no Terrestre (DNTT), sei prodús tan xapa mátrikula P 4000, Q 10.000, R 10.000, S 10.000 no T 1.610.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here