Sekretáriu Estadu Formasaun Profesionál Empregu, Alarico do Rosário foto hamutuk ho formandór lian Korea no konvidadu sira bainhira lansa kursu lian Korea iha Baucau, segunda (16/05). Imajen Tatoli/Natalino Belo.

BAUCAU, 16 maiu 2022 (TATOLI) – Governu liuhosi Sekretaria Estadu Formasaun, Profesionál no Empregu (SEFOPE) ofisiAlmente loke formasaun kursu lian Korea ba formandu na’in-181 iha Sentru Dezenvolvementu Komunitária (CDC, sigla Portugés), iha munisípiu Baucau.

Sekretáriu Estadu Formasaun Profesionál Empregu, Alarico do Rosário, esplika, objetivu hosi loke kursu lian Korea ne’e atu fó oportunidade ba juventude hosi área leste nian hanesan munisípiu Lautém, Viqueque, Manatuto no Baucau inklui loke dalan ba juventude hosi munisípiu seluk ne’ebé iha interese hakarak aprende nune’e futuru bele ba serbisu iha Korea.

“Formadór sira hosi Dili ne’ebé loke nia iha Baucau nune’e ohin halo lansamentu,” Sekretáriu Estadu Alarico hateten iha Triloka, segunda ne’e.

Durasaun formasaun durante fulan-neen hafoin sei tuir teste iha fulan-outubru tinan-ne’e hanesan parte hosi selesaun antes atu ba serbisu iha Korea.

Governu liuhosi SEFOPE kada tinan haruka traballadór timor-oan ba Korea mínimu na’in-500 nune’e hosi governu anteriór to’o agora traballadór iha Korea hamutuk rihun rua resin no tinan-ne’e hahú hosi janeiru to’o agora  traballadór besik 500 mak aranka ba Korea.

“Ita espera katak sira-ne’ebé tuir formasaun ne’e sai di’ak tanba ne’e papél SEFOPE nian atu hadi’a ema-nia kualidade moris di’ak liután,” Alarico akresenta.

Formandu lian Korea, Nívia da Silva hosi suku Buruma, postu administrativu Baucau Vila agradese tanba governu loke kursu lian Korea iha munisípiu Baucau tanba fasilita no loke oportunidade ba juventude sira atu aprende no prepara-aan hodi sai kandidatura nu’udar traballadór timor-oan iha Korea.

“Ha’u hakarak tuir kursu lian Korea atu hadi’a ekonomia uma-laran iha futuru,” Nívia hateten.

Governu Timor-Leste hamutuk ho governu Korea liuhosi Programa língua no aprenijazem Korea (KSLP-TL) hahú asina nota entendimentu ba programa refere iha tinan 2019 ho objetivu atu oferese formadór lian Korea hodi kapasita timor-oan ne’ebé iha interese atu aprende no loke oportunidade sai traballadór iha Korea.

Formandu lian Korea iha CDC Baucau daudaun ne’e hamutuk na’in-182 ne’ebé mai hosi munisípiu neen hanesan Lautém, Viqueque, Ainaro, Covalima, Ermera no Baucau no sei hanorin hosi formadór na’in-ida.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here