Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, segunda (16/05). Imajen Tatoli/Francisco Sony

DILI, 16 maiu 2022 (TATOLI)–Governu liuhosi reuniaun Konsellu Ministru (KM) estraordinária, segunda ne’e, aprova Proposta Rezolusaun Parlamentu Nasionál ne’ebé aprova konvensaun entre Repúblika Portugeza no Repúblika Demokrátika Timor-Leste (RDTL) atu evita dupla tributasaun no atu prevene evazaun fiskál iha matéria impostu kona-ba rendimentu.

Ministru Prezidénsia Konsellu Ministru, Fidelis Manuel Leite Magalhães, haktuir, konvensaun entre país rua ne’e asina ona iha Lisboa iha loron 27 setembru, ne’ebé parte rua tenke aprova.

“Portugal aprova ona konvensaun iha loron 08 juñu 2012. Ho Proposta Rezolusaun ida-ne’e, hein katak konvensaun tama iha vigór iha país rua ne’e,” Portavóz Governu ne’e hateten hafoin reuniaun ezekutivu ne’e, iha Palásiu Governu.

Notísia relevante: Governu aprova rezolusaun kona-ba konvensaun diretu ema ho defisiénsia

Objetivu konvensaun ne’e atu halakon dupla tributasaun internasionál, ne’ebé iha deferente kategoria rendimentu ne’ebé simu hosi rezidente Estadu rua nian, nune’e mós atu prevene evazaun fiskál.

Aleinde ne’e, hakarak mós atu kontribui ba kriasaun enkuadramentu fiskál ne’ebé estável no favorável ba dezenvolvimentu, troka komersiál inklui investimentu entre Estadu rua ne’e hodi halakon difikuldade fiskál ba sirkulasaun kapitál, teknolojia no traballadór sira.

“Konvensaun ida-ne’e atu fasilita troka informasaun natureza fiskál entre administrasaun tributária sira hosi Estadu rua ne’e,” nia subliña.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here