Osan Dolar Amérika. Imajen/Espesiál

DILI, 16 maiu 2022 (TATOLI)—Ministru Turizmu Komérsiu no Indústria (MTKI), José Lucas do Carmo da Silva, aprezenta projetu dekretu-lei iha reuniaun Konsellu Ministru (KM) estraordinária, segunda ne’e, kona-ba alterasaun dahuluk ba dekretu-lei númeru 8/2022, loron 16 fevereiru, ne’ebé kria liña kréditu ‘fasilidade garantia kréditu suave’.

“Diploma ne’ebé hetan aprovasaun ne’e hodi konsidera interese boot ba medida ne’ebé Governu kria ba setór privadu. Governu konsidera ne’e relevante atu hametin apoiu iha kuadru liña kréditu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu,  iha Palásiu Governu.

Nune’e, pontu sira ne’ebé introdúz iha alterasaun ne’e, inkui posibilidade empreza boot sai benefisiáriu, tanba iha Orsamentu Retifikativu, MTKI hato’o proposta ho valór millaun $50 atu reforsa liña kréditu.

Notísia relevante: PN aprova adisionál millaun $50 ba MTKI expande implementasaun kreditu suave

Valór limite másimu garantia kréditu ba kada empreza mikro, kiik, no média selesionadu atu hetan benefísiu hosi medida ne’e aumenta ba $250.000, enkuantu valór limite másimu garantia kréditu ba kada empreza boot  selesionadu aumenta ba millaun $1.

Prazu másimu hosi kontratu muda hosi tinan tolu ba tinan 10, ne’ebé ho alterasaun kuadru normativu liña kréditu  ne’e atu konkretiza kompromisu ne’ebé iha Programa Governu atu kria kondisaun posível sira hotu atu hasa’e diversifikasaun ekonómika iha área produtiva hanesan iha agrikultura, pekuária, peska no turizmu, aleinde setór indústria.

 Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here