Asosiasaun Halibur Defisiénsia Matan Timor-Leste (AHDMTL), Teresinha Ribeiro, lamenta Parlamentu Nasionál aprova Orsamentu Retifikaivu 2022. Imajen/Espesiál.

DILI, 16 maiu 2022 (TATOLI)—Portavós Asosiasaun Halibur Defisiénsia Matan Timor-Leste (AHDMTL), Teresinha Ribeiro, hateten AHDMTL lamenta no konsidera Orsamentu Retifikativu (OR) la nesesáriu atu Parlamentu Nasionál aprova tanba ema barak mak sei iha terús no mukit nia-laran.

“Ami hosi AHDMTL hakarak deklara ba públika katak ami sei la aseita aprovasaun Orsamentu Retifikasaun tanba haree ba situasaun reál ne’ebé mak iha Timor-Leste barak mak sei moris iha terús no mukit nia-laran, liu-liu ba ema ho defisiensia. Ami lamenta tebes ba aprovasaun OR iha Parlamentu Nasional. Ida-ne’e la fó benefisiu ba ema,” Porta-voz Teresinha, hateten ba jornalista sira, konferénsia imprensa, iha edifísiu AHDMTL, Comoro, Dili, segunda ne’e.

Aprovasaub OR ne’e la nesesáriu tanba ezekusaun Orsamentu Jerál Estadu (OJE) 2022 seidauk atinje 30% no foin mak 10%, nune’e la nesesáriu atu foti tan Orsamentu Retifikativu entaun husu ba Prezidente Repúblika atu halo análiza kle’an ba OR ne’e depois foti desizaun.

Orsamentu Órgaun no Servisu Administrasaun Sentrál hetan aumentu $1,241,210.747 no ninia totál agora sa’e ba $3,100,688.695, ne’ebé fahe tuir kategoria klasifikasaun ekonómiku hanesan Transférensia Públika ho montante $1,950,982.687; Bens no Servisu ho montante $467,077.382; Kapitál Dezenvolvimentu $390,177.399; Saláriu no Vensimentu $250,537.130; no Kapitál Menór $41,914.097. Ho aprovasaun ne’e sei Komisaun C ne’ebé trata asuntu Finansa Públika sei halo redasaun finál ho nia alterasaun iha proposta lei OJE hafoin sei enkamiña ba Prezidente Repúblika hodi bele promulga ka veta tuir konpeténsia Xefe Estadu nian.

Antes ne’e, proposta OR ho montante biliaun $1,129, ne’ebé prevee ba transferénsia públika $1,837,634.189, bens no servisu $466,877.382, kapitál dezenvolvimentu $390,177.399, saláriu no vensimentu $250,537.130 no kapitál menór $41,914.097.

Orsamentu Retifikativu ne’e mai ho medida 13 mak hanesan;

1) Atribuisaun osan fulan da-13 ba kada família (exeptu funsionáriu públiku sira;

2) Projetu Uma Kbiit Laek Plus;

3) Bolsu Estudu ba Mellór Graduadu Estudante;

4) Kriasaun Fundu Veteranu;

5) Programa Maundobra ba Postu Administrativu (PEMOPA);

6) Harii Sede ba Arte Marsiál no Rituál;

7) Programa Eskola iha uma (home school;

8) Oferese internet gratuitu ba eskola sira hahú hosi Eskola Infantil to’o Ensinu Superior;

9) Buka Empregu ba mellór alunu universitáriu sira;

10) Estabelesimentu Sekretária ba Asuntu Traballadór Esteriór no Komunidade Timoroan iha Diáspora;

11) Revitaliza kafé no subsídiu ba kafé Laku- teen;

12) Subsídiu akomodasaun ba PNTL no F-FDTL;

13) Pagamentu renumerasaun PNTL nian ho rejime salariál foun.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here