Adjunta Diretora Plan Internasionál, Fátima Estrela Soares. Imajen Tatoli/Francisco Sony.

DILI, 16 maiu 2022 (TATOLI)—Plan International Timor-Leste (PITL) liuhusi Inisiativa Spotlight parseria ho Uniaun Europeia (UE), Organizasuan Nasaun Unida (ONU) no UN Women, segunda ne’e, ensera Projetu Inisiativa Spotlight ne’ebé realzia iha Hotel Timor, Dili.

Serimónia enseramentu Projetu Inisiativa Spotlight ne’e ho tema “Dezenvolve Koñesimentu kona-ba aproximasaun ho komprimisu atu prevene Violénsia Kontra Feto no Labarik Feto (VKFLF)”.

“Ohin loron, ita termina no kompleta ona ita-nia projetu Inisiativa Spotligth. Ita konsege servisu hamutuk ba autór prevensaun ba violénsia bazea ba jéneru tantu instiuisaun Governu liu-liu Sekretária Estadu Igualiedade Inkluzaun (SEII). Ita prodús ona relatóriu avalaisaun asesmentu ba iha prevensaun violénsia bazea ba jéneru no mós plataforma asesivel online ne’ebé mak sei ajuda autór prevensaun ba oin,” Adjunta Diretora Plan Internasionál, Fátima Estrela, hateten ba jornalista sira, hafoin partisipa serimónia enserramentu projetu Inisiativa ba Spotligth.

Inisiativa Spotlight ne’e objetivu atu kontribui ba dezenvolve estratéjia Nasionál bazea ba evidénsia atu promove norma igualidade jeneru, atitude no komportamentu objetivu espesífiku mak atu dezenvolve Timor-Leste ida-ne’ebé kontestualizadu utiliza produtu inovativu kona-ba abordajen ba prevensaun VKFLF.

Projetu Inisiativa Spotligth durante tinan ida hahú iha fulan-marsu to’o 2021 to’o marsu 2022, ne’ebé hala’o iha munisípiu Dili, Ermera, Oé-Cusse no Viqueque.

Ida-ne’e, nia dehan, plataforma ne’ebé mak sentradu ba SEEI nia parte hodi haree asesu ba informasaun relevante.

“Tanba durante ita-nia avaliasaun ba prevensaun violénsia bazea ba jéneru hosi ita-nia rekomendasaun mak bele uza relatóriu ne’ebé mak sei sai hanesan referénsia ba iha dezenvolvimentu Planu Asaun Anuál Violénsia Bazea ba Jéneru (PAN-VBJ) períodu tuir mai,” nia dehan.

Nia rekomenda atu ajuda Governu bele lidera hodi haree oinsá ba mekanizmu servisu autór prevensaun sira bele halo servisu ho efetivu liután ba asuntu prevensaun.

Liuhosi Projetu Inisiativa Spotlight mak hodi dezenvolve matadalan hodi aplika koñesimentu no hamosu akordu kona-ba prínsipiu xave entre autór prinsipál ba prevensaun hanesan Governu, Organizasaun Sosiedade Sivil no parseiru dezenvolvimentu sira.

Projetu ida-ne’e prodús ona Relatóriu Avaliasaun Mekanizmu Aproximasaun ba Servisu Prevensaun iha Timor-Leste bazea ba análiza no kontestualizasaun hosi kompromisu aproximasaun ba Violénsia Kontra Feto no Labarik Feto no dezenvolve Plataforma Mídia Data Online ho formatu asesivel hanesan vizuál ka video, audio no lingua jestuál ba autór prevensaun sira iha Timor-Leste ne’ebé aliña iha SEII nia Website hodi konsolida informasaun kona-ba existénsia Prevensaun nu’udar estratejia ba mudansa komportamentu.

SEII hanesan mákina Estadu nian ne’ebé ho nia kompeténsia liuhosi Dekretu-Lei Nú. 17/2091 husi loron 11 fulan-jullu, atu halo hosi estratéjia abordajen integradu jéneru hosi lei, polítika, planu no orsamentu, prevensaun violénsia bazea ba jéneru mak; “Haforsa Feto iha seitór ekonomia, Haforsa Feto hodi foti desizaun iha vida polítika Kontinua hala’o advokasia ba instituisaun Governu nian atu kria kondisaun hodi responde ba situasaun hosi Kualker tipu violénsia hasoru feto no labarik feto”.

Sekretária Estadu Igualdade no Inkluzaun (SEII), Maria do Rosário Fátima Correia, iha kompromisu atu kontinua kolabora ho parseiru sira hodi hariku prosesu dezenvolvimentu Planu Asaun Anuál Violénsia Bazea ba Jéneru (PAN-VBJ) iha Pilar Prevensaun nian.

“Ami agradese ba progresu hotu hosi PITL espesialmente, ba kolaborasaun hodi entegra Plataforma Mídia ho Fomatu Asesivel ba SEII, ami sei kontinua mantein funisonamentu plataforma refere,” nia hateten.

Embaixadór Uniaun Europeia iha Timor-Leste, Andrew Jacobs, hateten Inisitiva Spotlight nu’udar parseria multi-anual entre UE no ONU ho investimentu globál millaun $550 hosi Uniaun Europeia.

Ba Timor-Leste, investimentu tinan tolu ho valór milaun $15 ho objetivu hodi haforsa feramentu no instituisaun legál, hodi promove norma sosiál pozitivu, hasa’e asesu ba servisu apoiu ba sobrevivente violénsia, hadi’ak kolesaun no muda dadus ba mellora polítika no hodi haforsa parseria ho Sosiedade Sivil sira.

“Uniaun Europeia selebra kontribuisaun Plan Internasionál nian, iha projetu Inisiativa Spotight hodi luta ba igualdade jéneru, maibé jornada ida-ne’e iha Timor-Leste kontinua kontra violénsia bazea ba jéneru. Maibé Uniaun Europeia nafatin kompremetidu no involve hodi prioritiza direitu feto nian, la husik ema ida iha kotuk,” Andrew hateten.

Koordenadór Rezidente ONU iha Timor-Leste, Roy Trivedy, hateten violénsia nunka sai parte ida hosi komportamentu umanu, bele antesipa no prevene violénsia, data, koñesimentu, informasaun no evidénsia bazeada seluk tan aborda kontribuisaun hirak-ne’e hodi prevene violénsia.

“Inisiativa Spotlight implementa to’o ona nia rohan. Rezultadu mak halo relatóriu Avaliasaun ba Servisu Abordajen Prevensaun iha Timor-Leste, inklui dezenvolve Plataforma Midia Online ho Formatu Asesive sei ajuda Governu ba dezenvolve Planu Asaun Nsional-Violensia Bazea ba Jéneru (PAN-GBV), períodu tuir-mai no kontinua servisu ho referénsia substansiál ba autór prevensaun sira,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here