Xefe suku Afasa, Joaquim Fernandes Ximenes. Imajen Tatoli/Natalino Belo

BAUCAU, 15 maiu 2022 (TATOLI)—Ekipa hosi Programa Nasionál Dezenvolvimentu Suku (PNDS) identifika ona uma-kain sia iha suku Afasa, postu admistrativu Quelicai, munisípiu Baucau sei sai benefisiáriu Uma Kbiit Laek (UKL).

“Prosesu preparasaun daudaun finaliza ona kontajen no tuir planu sei hahú konstrusaun iha inísiu fulan-juñu tanba ne’e daudaun sei prepara halo koutasaun ba kompañia fornesedór materiál,” Xefe suku Afasa, Joaquim Fernandes Ximenes, informa ba Agência Tatoli, via telefónika, domingu ne’e.

Notísia relevante: PNDS Baucau sei lansa UKL faze daruak iha abríl

Aleinde ne’e, ekipa responsável programa sei halo enkontru daruak hodi fó kontratu ba badaen sira no tempu besik sei mobiliza materiál ba fatin konstrusaun.

Tuir Autoridade suku, iha kada aldeia, uma-kain ne’ebé prienxe kritéria sei hetan hotu subsídiu konstrusaun UKL iha tinan ne’e, nune’e labele iha diskriminasaun.

Ekipa verifikadór kompostu hosi autoridade suku, xefe aldeia, Ofisiál Polísia Suku (OPS) no veteranu, ne’ebé deside benefisiáriu sia hosi aldeia tolu iha suku Afasa hanesan aldeia Boralai iha uma haat no aldeia Uligata iha uma haat, enkuantu aldeia Vekubuti tanba iha faze dahuluk uma-kain tolu hetan ona UKL maka ba faze ne’e uma-kain ida mak hetan hodi kompleta uma haat iha aldeia ne’e.

Nune’e, alokasaun orsamentu ba konstrusaun UKL sia iha suku Afasa hamutuk $153.000 resin, ne’ebé kada uma ho kustu $17.000 no kada benefisiáriu sei hetan direitu uma ho medida metru kuadradu 48, ho kuartu tolu, sala vizita ida no dapur ida.

Entertantu, suku Afasa kompostu hosi aldeia tolu hanesan Boralai ,Uligata no Vekubuti ho totál abitante hamutuk 1.204.

Antes ne’e, Autoridade Baucau hetan alokasaun orsamentu hodi implementa programa UKL hamutuk millaun $1,8, ne’ebé hosi totál ne’e atu finansia atividade fíziku hamutuk millaun $1,734 ba suku 34 no despeza operasionál $68.000.

Jornalista  : Natalino Belo

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here