Jogu Sudeste Aziátiku entre ekipa selesaun Vitname no Timor-Leste, iha iha Estádiu Nasionál, Hanoi, Vietname, domingu (15/05). Imajen/Espesiál

VIETNAME, 15 maiu 2022 (TATOLI)Ekipa selesaun nasionál Timor-Leste Under (U-23) obrigadu tenke elemina ona hosi Jogu Sudeste Aziátiku (SEA Games, sigla inglés), iha grupu A tanba lakon dala-haat tutuir malu iha jogu faze grupu.

Ikus liu, Timor-Leste termina jogu kontra ekipa uma-na’in, Vietname iha Estádiu Nasionál Vietname, iha domingu kalan ne’e, ho skore ikus 0-2.

Maski lakon, Timor-Leste hatudu jogu ho dignidade nu’udar timor-oan hodi reprezenta bandeira Repúblika Demokrátika Timor-Leste (RDTL) hodi joga tuir de’it regra saida mak iha ona.

Notísia relevante: Nunka manán iha Sea Games, Timor-Leste sei kompleta jogu ikus ho Vietname

Iha minutu dahuluk, hahú ekipa rua lansa kedan kontra no atake ba malu tuir tékniku no abilidade ekipa ida-idak nian.

Tabela klasifikasaun SEA Games 2021. Imajen/Espesiál

Timor-Leste hala’o jogu ho modelu defensiva no la ansi halo golu bainhira seidauk iha oportunidade, enkuantu Vietname hala’o jogu ofensivu ho ritmu ne’ebé maka’as atu halo golu lais, maibé xuta barak mak  nunka kona iha alvu.

Ho nune’e, ritmu jogu ba ekipa rua komesa manas liután ho ida-idak nia ambisaun, bele hatama golu lais hodi hetan hetan Vitória iha jogu ne’e.

Maski ho kontra atake ba malu maka’as entre ekipa selesaun nasaun rua, maibé laiha golu ruma hosi parte rua bainhira atu termina parte dahuluk, nune’e ho empata 0-0.

Hakur ba parte daruak, ekipa rua nafatin mantein ho ida-idak nia tékniku no ablilidade tuir saida mak treinadór haraik ona ba sira, maibé Timor-Leste nafatin hatudu jogu ne’ebé di’ak maski hetan presaun maka’as hosi ekipa uma-na’in.

Jogu manas liután iha minutu 50 ba leten, halo Timor-Leste atrapalla, ho nune’e Vietname uza kedan oportunidade hodi lansa presaun maka’as, no tama minutu 52, Jogadór Tung Nguyen Van (11) lansa golu dahuluk hodi muda rezultadu ba 0-1.

Ho rezultadu ne’e, halo kedan mentalidade jogadór timor-oan sira komesa tun daudaun no ladún kontrola bola ho di’ak, ikus mai iha minutu 65 sira lakon tan jogu no fó biban ba Jogadór Vietname, Minh Ho Thanh (19) lansa golu ikus, hodi hametin liután rezultadu ba 0-2.

Golu ne’e mak termina ona Vietname nia Vitória hodi kompleta nia pontu hamutuk 10 sai hanesan ekipa juara pool iha grupu A.

Ho nune’e, Timor-Leste obrigadu tenke lakon no elemina hosi jogu hamutuk ho Myanmar, Filipina no Indonézia hanesan ekipa runner-up ho pontu sia, ultrapasa ba faze semi finál.

Durante jogu, Timor-Leste nunka manán dala-ida no empata dala-ida, lakon ho Filipina 0-4, lakon ho Myanmar 2-3, lakon ho Indonézia 1-4 no ikus liu lakon ho Vietname 0-2.

Ekipa hosi nasaun tolu ne’ebé la ultrapasa ba kuartu finál tanba pontu la to’o maka Myanmar hela de’it ho pontu neen, Filipina pontu haat no Timor-Leste pontu mamuk alias zero, nune’e, automátikamente sai hosi klasifikasaun.

Antes ne’e,  iha fevereiru liubá, ekipa selesaun nasional U-23 konsege hamorin Timor-Leste nia naran iha jogu Asian Football Federation (AFF) ne’ebé okupa iha terseiru lugar.

Bainhira sai hanesan terseiru lugar iha kopa AFF, Timor-Leste konsege hatún nasaun jigante sira iha Ázia hanesan Brunei Darusalam, Kamboja no seluk tan.

SEA Games ba dala-31 tinan 2021, hala’o iha Hanoi, Vietname, hahú loron 12 to’o 23 maiu 2022.

Eventu multidesportivu ne’e, aprezenta kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).

Eventu ne’e partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

Jornalista : Hortencio Sanchez

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here