DILI, 14 maiu 2022 (TATOLI) – Asosiasaun Juventude Hakbi’it Justisa Timor-Leste (AJHJ-TL) fanu juventude hodi fó onra no valoriza luta libertasaun pátria iha ámbitu komemorasaun restaurasaun independénsia ba-dala 20.

“Objetivu prinsipál husi semináriu ne’e mak komemora restaurasaun independénsia ba dala-20. Objetivu ida seluk mak disemina informasaun ba foin sa’e sira atu kumpriende ita-nia konstituisaun ka Lei-inan. No, objetivu ida ikusliu mak hafanu juventude sira hodi fó onra no valoriza ba luta libertasaun pátria,”  Prezidente Komisaun Organizadora, Cecilia Osorio, hateten, iha Salaun IOB, Dili, sábadu semana ne’e.

Semináriu ne’e hetan partisipasaun másimu husi estudante universitariu fakuldade direitu husi Universidade Dili, UNPAZ no Universidade Nasional Timor-Lorosa’e (UNTL).

Juventude sira presiza kompriende konstituisaun atu moris nu’udar sidadaun di’ak iha sosiedade Timor-Leste hodi onra no valoriza luta libertasaun pátria.

Oradór Alexander Cortereal hateten, sidadun sira, liu-liu foin sa’e sira presiza hatene saida mak Konstituisaun hodi kompriende saida mak Estadu Direitu no separasaun poder entre Órgaun Estadu.

“Separasaun no divizaun poder entre orgaun ha’at hanesan Parlamentu, Prezidente, Judisiáriu no Governu ne’e tenke lao tuir ninia regra ne’ebé mak hatuur ona iha Konstituisaun,” Cortereal akresenta.

Iha ninia intervensaun, Deputadu Joaquim dos Santos afirma, sidadaun sira, liu-liu foin sa’e sira presiza hatene saida mak Konstituisaun.

“Pergunta ida ne’ebé ema tenke hetan resposta maka saida mak konstituisaun. Entaun importánsia ba ema ida-idak tenke banati tuir nasaun ninia inan-aman sira (País de Nação) ne’ebé mak povu fo fiar hodi halo Konstituisaun,” membru parlamentár dehan.

Nia akresenta sidadaun hotu presiza kompriende istória Timor-Leste atu nune’e bele kompriende oinsá mak Timor-Leste hakat to kriasaun Konstituisaun RDTL.

Iha fatin hanesan, partisipante iha semináriu refere, Sidália de Orleans husi Asosiasaun Lege Lata Lege Ferenda (A3LF) hateten katak semináriu refere nu’udar oportunidade di’ak ida hodi hasa’e nia koñesimentu kona-ba Lei Inan ka Konstituisaun Timor-Leste.

“Nu’udar Estadu Direitu no Demokrátiku, hanesan sidadaun ne’ebé di’ak, ita mós presiza hatene saida mak konstituisaun ne’e rasik. Tuir ha’u-nia hanoin, ita-nia nasaun presiza kapasita nafatin ita-nia estudante no foin sa’e sira kona-ba ita nia istória no lala’ok Estadu ida nian,” Orleans hatutan.

Jornalista: Filomeno Martins 

Editor: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here