Prezidente Sub-KRAM simbolika kaer bandeira organizasaun IKS, hala’o marsa iha Viqueque Vila. Imajen Tatoli/Vitorino da Costa.

VIQUEQUE, 14 Maiu 2022 (TATOLI) – Prezidente Sub-Reguladór Arte Marsiál (KRAM), Cosme Sarmento, hateten governu deside reativa arte-marsiál, maibé tenke  kumpri lei  sira- ne’ebé vigora iha Timor Leste.

“Governu fó ona fiar ba arte-marsiál sira-ne’ebé durante taka hanesan IKS, KORK no PSHT, atu reativa, tenke kumpri lei ne’ebé Timor Leste nian iha. Nune’e hala’o atividade organizasaun nian la’o ho hakmatek. Maibé ita rasik maka la kumpri ka viola regra sira, ita rasik maka taka dalan ba organizasaun”,  Cosme Sarmento informa ba Agência Tatoli, iha serimónia agradesementu ba governu, ne’ebé  realiza hosi  Ikatan Kera Sakti, iha kampu voleiból, postu administrativu Viqueque Vila, sábadu ne’e.

Prezidente Sub-KRAM munisípiu Viqueque hatutan, organizasaun arte marsiál ninia objetivu di’ak hotu, laiha organizasaun ida maka aat, maibé ema sempre uza sala, organizasaun nunka sala tanba ne’e governu deside reativa fali kumpri lei.

“Kumpri lei ba tanba ita iha hotu iha sistema nian laran no sistem  maka sei regula ita, saida maka ita-nia governu haruka ita tenke halo-tuir,” nia fó hanoin.

Iha fatin hanesan, Koordenadór IKS Munisípiu Viqueque,  Carlos da Costa Soares, haktuir,    governu autoriza arte marsiál sira tanba ne’e maka realiza sentidu agradesimentu ida ba governu  ne’ebé publika ona iha Jornál Repúblika.

“Tanba ne’e, ohin ami rona legalizasaun ne’ebé publika hosi Jornál Repúblika, ita hotu tenke serteza ba ita-nia an ho responsabilidade morá no iha vontade di’ak ho espíritu arte marsiál nian,” Carlos realsa.

Nia dehan, governu fó ona tempu ba organizasaun sira hodi uza fila-fali farda arte-marsiál idak-idak nian, maibé kumpre vlei ne’ebé vigra iha rai ida-ne’e.

“Ha’u husu membru no estrutura IKS tomak, laiha ema-ida halo tuir ita-boot sira-nia hakarak rasik, ita hotu-hotu iha lei nia okos. Konstituisaun RDTL maka boot liu organizasaun ninian,” nia fó hanoin ba membru arte-marsiál sira.

Membru organizasaun IKS eziste iha munisípiu Viqueque hamutuk rihun tolu-resin maka daudaun ne’e espalla iha postu adiministrativu lima.

Iha serimónia agradesementu ne’e partisipa hosi Prezidente Sub KRAM, Polísia Nasionál Timor Leste (PNTL), estrutura IKS munisípiu Viqueque hamutuk ho membru sira hala’o  ativdade la’o-ain iha  postu administrativu Viqueque Vila.

Jornalista   : Vitorino Lopes da Costa

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here