DILI, 14 maiu 2022 (TATOLI) – Ministériu Turizmu, Komérsiu no Indústria (MTKI), sábadu ne’e iha Sentru Konvensaun Dili (CCD, siglá portugés) hala’o abertura ba kompetisaun soru-tais nível nasionál ba feto foinsa’e hosi munisípiu 12 no Rejiaun Administrativu Espesiál Óe-Cusse Ambeno (RAEOA).
“Ohin, dala-ida tán ita iha ne’e hala’o abertura ba kompetisaun soru-tais nível nasionál ho hanoin katak inan feton sira hosi territóriu mai hola-parte no eventu nasionál ne’e importante tebes atu fanun no re-lembra fali tradisaun ne’ebé durante ne’e eransa hosi avo-beiala husik hela no asegura valór hodi valoriza tais ne’e rasik,” Ministru José Lucas do Carmo da Silva, hateten iha diskursu bainhira halo abertura ba kompetisaun soru-tais ne’e.
Governante ne’e akresenta, ho atividade ne’e bele prezerva no promove nafatin atu diversifika no hakbiit kualidade tais ne’e rasik.
“Diversifikasaun ho nia kualidade sai úniku ho karatér Timor-Leste nian, mantein identidade. Entaun ho eventu kompetisaun sira hanesan ne’e aumenta nia kualidade maibé mantein konserva ita-nia identidade original,” nia dehan.
Haree ba globalizasaun ne’ebé tama ona faze modernizasaun presiza adapta maibé oinsá atu hasa’e kualidade tais ne’e rasik ho nia orijinalidade.
Tuir nia, durante ne’e prátika soru-tais hosi inan feton sira iha valór barak kontribui tebes hosi aspeitu sosíu, kulturál no ekonomia. Governu kompromete ba ba oin sei esforsu atu prezerva no dezenvolve liután tais tanba tais Timor-Leste hetan ona rekoñesimentu hosi UNESCO sai patrimóniu mundiál.
Nia agradese mós ba ekipa diresaun nasionál ministériu ho servisu entidade seluk bele realiza atividade kompetisaun ne’e.
Entretantu, kompetisaun ne’e hahú hosi loron 14-19 fulan maiu tinan ne’e ne’ebé partisipa hosi grupu feto foinsa’e hosi munisípiu 12 no RAEOA no kada munisípiu reprezenta grupu ida.
Jornalista : Nelson de Sousa
Editór : Evaristo Soares Martins
