COVALIMA 14 maiu 2022 (TATOLI) – Komisaun Anti Korrupsaun (CAC, sigla portugés), seidauk iha rekursu umanu ne’ebé sufisiente kontrola funsionáriu no kargu xefia ne’ebé uza veíkulu estadu halo movimentu liu oras serbiu no iha fin de semana iha munisípiu sira.
Maske CAC menus rekursu umanu atu kontrola veíkulu estadu ba kargu xefia no funsionáiu sira iha munisípiu, maibé koordenasaun entre CAC ho Diresaun Patrimóniu Estadu no PNTL liuhosi unidade Polísia Tránzitu sei haree hamutuk.
“CAC atu mai to’o munisípiu ita lato’o entaun koordenasaun liuhosi grupu ida bolu ekipa fiskalizadór ba patromóniu Estadu, banhira iha tempu loron boot ita hamutuk ho polísia sei kontrola, ita simu de’it relatóriu hanesan loron boot finadu, natál no tinan foun,” Adjuntu Komisáriu CAC ba Asuntu Prevensaun no Sensibilizasaun, Luis de Oliveira Sampaio, ba Agência Tatoli, iha postu administrativu Zumalai, kinta ne’e.
Tanba ne’e CAC halo ona akordu ho Polísia atu kontrola utilizadór veíkulu estadu nian iha munisípiu.
“Kazu balun hanesan ita halo identifikasaun ita submete ba Ministériu Públiku, kazu balun fó CAC no balun sira (MP) kaer rasik, ita identifika ho xapa-matríkula ita atu koordena ho jestaun patrimóniu atu haree, ”Adjunto ne’e informa.
“Ita kontrola iha momentu loron boot sira de’it, loron baiNbain ita la konsentra tanba rekursu kiik loOs labele to’o mai iha munisipiu sira,” nia haktuir.
Jornalista : Celestina Teles
Editór : Evaristo Soares Martins
