Diretór Terra Propriedade munisípiu Viqueque, Apolinário Ximenes. Imajen Tatoli/Vitorino Lopes da Costa

VIQUEQUE, 13 maiu 2022 (TATOLI)—Terra Propriedade munisípiu Viqueque konsege rekolla taxa hosi arrendamentu hamutuk $13.671 ba kofre Estadu, hahú hosi janeiru to’o maiu 2022.

Diretór Terra Propriedade munisípiu Viqueque, Apolinário Ximenes, informa, kontratu arrendamentu iha munisípiu Viqueque hamutuk 156, propriedade Estadu 572, propriedade privadu ne’ebé abandona 33 no halo notifikasaun atu selu arrendamentu 83.

“Propriedade ne’ebé iha munisípiu Viqueque konsege identifika hamutuk 572. Kona-ba ita-nia arrendatáriu sira ne’ebé la selu fulan barak no balun tinan-lima, ami hasai notifikasaun ba sira hahú hosi janeiru to’o maiu hamutuk 118,” Diretór hateten ba Agência Tatoli, iha ninia knaar fatin, Beloi, sesta ne’e.

Notísia relevante: Terras Propriedade rejista kazu disputa rai lima iha Covalima

Notifikasaun ne’e tuir regra ne’ebé hatúr ona iha lei númeru 1/2003, 10 marsu kona-ba Rejime Jurídiku Bens imóvel.

“Tanba ne’e, sidadaun sira ne’ebé durante ne’e la selu arrendamentu ba Estadu, ita-nia arrendatáriu sira sei hetan multa 50% hosi totál dívida ne’ebé iha,” nia akresenta.

Nia dehan, kona-ba kontratu ne’ebé iha munisípiu Viqueque ba arrendamentu sei tama hotu konta Estadu nian.

“Tipu arrendamentu iha Viqueque maka hanesan rezidénsia uza ba edifísiu no negósiu, ninia tarifa ne’e ami selu tuir ida-ne’e. Ezemplu hanesan rezidénsia  komunidade kada fulan selu $10, uza ba edifísiu ne’e ami sei haree tuir atividade profit ka naun profit,” nia hato’o.

Aleinde ne’e, iha propridade Estadu barak maka to’o agora seidauk identifika tanba iha liu área remota difikulta ba funsionáriu Diresaun Terra Propriedade.

“Ami iha ne’e problema maka transporte, ne’ebé dala ruma ami labele asesu ba fatin sira ne’ebé transporte labele asesu maibé ami nafatin halo esforu hodi to’o iha fatin área rurál sira hodi rejista propriedade Estadu.  Foin lalais ne’e ami hetan ona apoiu karreta ida, maibé ami sei haree kareta ninia kondiasaun hodi fasilita ami hala’o serbisu,” Diretór tenik.

Durante ne’e, Terra Propriedade halo ona kontrata ba komunidade ne’ebé hela iha propriedade Estadu sira iha postu Ossu, Lacluta Uatucarbau, Uatulari no Viqueque vila.

“Uza propriedade maioria iha postu Viqueque vila, ne’ebé ami halo identifikasaun,  regulariza no selebra kedas kontratu. Propriedade ne’ebé seidauk konsege rejista ami sei esforsu nune’e iha futuru tenki rejista hotu,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here