Sarani Nítibe selebra 13 maiu ho kompetisaun tebe no bidu tradisionál no liturjia. Imajen Tatoli/Abílio Elo Nini.

OÉ-CUSSE, 13 maiu 2022 (TATOLI) – Sarani Kátolika iha párokia Baoknana, sub-rejiaun Nítibe, Rejiaun Administrasaun Espesiál Oé-Cusse Ambeno (RAEOA), realiza kompetisaun tebe tradionál no liturjia entre kapela hodi selebra loron padrueira párokia Nossa señora de Fátima iha 13 Maiu, sesta ne’e.

Parókia Baoknana lokaliza iha tasi-ibun suku Usitaku, sub-rejiaun Nítibe hodi akumula sarani sira mai hosi suku lima; suku Ban-Afi, Lela-Ufe, Bene-Ufe, Suni-Ufe no Usitaku.

Prezidente Komisaun Organizadora, Wendelino Efi, hatete, selebrasaun loron padrueira Nosa Señora de Fátima parókia Baoknana realiza ho kompetisaun atu anima sarani sira, ne’ebé tinan kotuk la konsege realiza tanba situasaun pandemia COVID-19.

Nia informa, atividade ne’ebé sai ajenda prinsipál iha párokia ne’e, bazea enkontru Konsellu Pastorál Párokia (CPP, sigla portugés) nian, iha atividade desportu, kompetisaun liturjia lé biblia, kompetisaun kultura tebe tradisionál, bidu tradisionál, dada tali no halo prosesaun ho sarani sira.

“Atividade hirak-ne’e ho signifika atu inkulturasaun ita-nia tradisaun tanba daudaun ne’e, ita moris ho globalizasaun modernu, ne’ebé ita-nia valór kultura komesa mihis daudaun, tán ne’e iha selebrasaun párokia Baoknana igreja iha hanoin atu promove kultura liuhosi atividade selebrasaun loron padruira Nossa Señora de Fátima,” Wendelino Efi, informa ba Agência Tatoli iha Nítibe, kinta ne’e.

Nia fó-sai katak, atividade ne’ebé realiza dahuluk maka desportu futeból mane no voleiból ba mane no feto, realiza entre kapela ne’ebé perténsia parókia Baoknana nian.

Nia informa, antes realiza atividade hirak ne’e liuhosi enkontru Konsellu Partorál hamutuk ho katekista kada kapela, tuur hamutuk ko’alia kona-ba kbiit finanseiru ba prémiu nian, tanba iha parókia laiha fundu sufisiente atu fasilita prémiu ba konkorente sira.

“Razaun ne’e iha konkordánsia hosi katekista kapela sira, katak objetivu hosi atividade labele haree liu ba prémiu maibé ita halo selebarasaun ne’e ho animasaun ba sarani-sira, liuhosi atividade ne’e ita bele promove ita-nia talentu kultura rasik, ba prémiu iha maibé haree hosi administrasaun ne’ebé konkorente sira rejista, tanba kada kapela rejista konkonte ida $5,” nia katak.

Padre Vígariu Párokia Baoknana, Simpliçio Boamali, SVD, konsidera selebrasaun loron padrueira importante, atu hahí maromak no haksolok simu Na’in-Feto hanesan mahein iha parókia Baoknana.

“Ha’u haree sarani tomak kontente atu halibur hamutuk atu partisipa hodi haksolok simu Na’in-Feto nia prezensa iha parókia ne’e, atu festeza ho animasaun kulturál tuir tradisaun sarani sira iha Nítibe nian,” nia katak.

Sarani Baptista Lelan, hosi estasaun misionáriu Fatubena, orgullu no agradese ba Konsellu Pastorál tanba inisitiva halo animasaun ba sarani sira hosi hakbesik ba maromak, hasolok simu loron padrueira Nossa Señora de  Fatima.

“Ha’u orgullu tanba tinan lima nia laran, foin dahuluk selebra loron padrueira parókia ho animasaun kompetisaun kulturan no liturjia, orgullu tanba iha kooperasaun padre párokia ho autoridade bele realiza selebrasaun ne’e, no hetan partisipasaun másimu hosi sarani suku lima iha Nítibe,” nia orgullu.

Parókia Baoknana iha estasaun rua, estasaun misionáriu Fatubena iha suku Usitako akumula kapela tolu (3), kapela Oéltam, Poasbot ho kapela estasaun, iha estasaun misionáriu Oélfab iha suku Lela-Ufe akumula kapela hitu (7), kapela Noetoko, Nefomatasa, Kusi, Kuat-Enes, Mahata, Nefolete no Kiubukif.

Nune’e iha sentru parókia Baoknana perténsia tasi-ibun akumula kapela ualu (8), kapela Naktuka, Trans, Bítila, Citrana Lamasin, Bona, Oénunu no Kabana.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here