Primeiru-ministru (PM), Taur Matan Ruak, lansa melloramentu sistema bee-moos. Imajen Tatoli/Argentina Cardoso

LAGA, 13 maiu 2022 (TATOLI)- Primeiru-ministru (PM), Taur Matan Ruak, lansa melloramentu sistema bee-moos iha Suku Soba, Postu administrativu Laga no Suku  Bualale, Postu administrativu Quelicai, Munisípiu Baucau, sesta ne’e.

Primeiru-ministru, Taur Matan Ruak liuhusi diskursu hateten, projetu ne’e hanesan parte ida husi mudansa ba povu nia moris di’ak.

“Muda uluk ita-nia an se uainhira ita hakarak muda nasaun. Nasaun só bele muda kuandu ita idak-idak muda ita-nia an. Projetu ida ne’e halo parte ba padraun ida ne’e, oinsá muda ita-nia moris”.

Iha biban ne’e, Vise-ministru obra públika, Nicolau dos Reis afirma katak, Ministériu obra públika (MOP) toma responsabilidade atu hadi’a infraestrutura bázika sira, hanesan estrada, ahi no bee-moos, husu ba komunidade ne’ebé sai benefisiáriu ba bee-moos atu serbisu hamutuk hodi kontribui.

“Ha’u husu ba uma-kain hirak ne’ebé sai benefisiáriu atu kontribui liuliu kolabora ho emprezáriu ne’ebé halo projetu ida ne’e, liuliu kona-ba manutensaun ba bomba bee nian,” ezekutivu ne’e husu.

Enkuantu, Prezidente Bee Timor-Leste, Ep (BTL,Ep), Carlos Peloi hateten, BTL Ep konsege inaugura ona projetu balun no balun m’os halo ona lansamentu, tanba ne’e husu ekipa tékniku atu fahe serbisu ba malu.

“Ba progresu prosesu imlementasaun projetu, BTL nia mensajen mak fahe serbisu liuliu kona-ba kestaun tékniku nian entrega ba tékniku no parseiru BTL nian nune’e bele halo servisu ho diak”.

Entretantu, projetu bee-moos iha Suku Soba, Postu administrativu Laga sei benefísia komundiade 240-resin.

Projetu sistema bee-moos iha Suku Bualale, Postu administrativu Quelecai sei benefísia uluk ba uma-kain 100-resin, no benefisia mós ba Suku Bagia.

Hafoin halo lansamentu melloramentu iha suku rua ne’e, Primeiru-ministru akompaña husi, Prezidente IGE, I.P, EDTL Ep, sei kontinua inaugura sentru eletrisidade Waibobo, iha Munisípiu Viqueque.

Jornalista: Argentina Cardoso

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here