WAIBOBO-VIQUEQUE, 13 maiu 2022 (TATOLI)- Governu Konstitusionál da-ualu lideradu husi Primeiru-ministru, Taur Matan Ruak, hafoin lansa sistema melloramentu bee-moos iha Baucau, kontinua inaugura eletrisidade iha Suku Waibobo no Suku Samarogo, Postu administrativu Ossu, Munisípiu Viqueque.

Eletrisidade ba povu ne’e, inaugura iha sesta lorokraik, ho distánsia 11,1 Km.

Hafoin inaugura, Xefe governu Taur Matan Ruak husu ba komunidade suku rua ne’e, atu kuidadu no kontribui, no iha sentimentu pertense ba projetu ne’e nune’e tenki servisu hamutuk ho Eletrisidade Timor-Leste (EDTL, sigla portugés).

“Tenki iha sentimentu pertense ba projetu ne’e katak ha’u mak na’in, no husu ba inan-aman sira atu kontribui liuhusi kontrola ahi, no kontaktu tékniku EDTL kuandu hasoru problema”.

Vise-ministru obra públika, Nicolau Lino Freitas agradese ba prezidente EDTL, Ep nia esforsu atu oinsá suku hotu iha Timór laran asesu ba ahi no bele sente mós hanesan Suku Waibobo.

Iha biban ne’e mós, Prezidente EDTL Ep, Paulo da Silva haktuir katak EDTL Ep esforsu atu suku hotu bele asesu ba ahi inklui suku Waibobo.

“Ida ne’e foin mak hahú tanba ne’e ami sei oferese ahi gratuita, maibé fulan tolu ou haat tan ami sei monta kontadór tanba ne’e ita hotu bele kontribui atu dezenvolvimentu kontinua la’o”.

Ezekutivu ne’e husu povu nia kontribusaun atu poupa ahi hodi nune’e bele kontribui ba redús kustu kombústivel.

‘’Uainhira la uza enerjia karik, halo favór lalika loke, tanba dalaruma ita la sente ita-nia mákina iha sentrál Hera no Betano traballu nafatin. Kuandu ita uza barak liu, ita uza barak liután’’.

Iha sorin seluk, Xefe suku Waibobo, Gulat Guterres agradese ba governu tanba bele fó naroman ba sira.

“Agradese ba governu ne’ebé fornese eletrisidade ba ita-nia komunidade ne’ebé mak durante tempu naruk nia laran sira hein”.

Suku Waibobo iha aldeia tolu mak dadaun ne’e asesu ona ba liña eletrisidade inklui suku Samarogo.

EDTL, Ep esforsu nafatin atu suku hotu iha territóriu Timór laran tomak bele asesu hotu ba ahi iha tinan ne’e nia laran.

Jornalista: Argentina Cardoso 

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here