Ekipa Ministériu Públiku hamutuk ho Polísia Nasionál Timo-Leste (PNTL) munisípiu Bobonaro, sunu hela objetu apreensaun, iha aldeia Tunubibi, suku Tapo-Memo. Imajen Tatoli/Sérgio da Cruz.

BOBONARO, 13 maiu 2022 (TATOLI) – Gabinete Sentrál Kombate Korrupasaun no Kriminalidade Organizadu hosi Prokuradoria Jerál Repúblika, koopera ho Polísia Nasionál Timor-Leste (PNTL) Munisípiu Bobonaro, sesta ne’e sunu objetu kontra bandu iha área Sekar, aldeia Tunubibi, suku Tapo-Memo, postu administrativu Maliana, munisípiu Bobonaro.

Objetu auto aperasaun hirak-ne’ebé halo destroisaun ne’e mak hanesan; sigaru marka Surya 12 hamutuk karton 39 ho nia slop 79 no sigaru Pohong-Sagu hamutuk karton 76 ne’ebé Polísia halo apreensaun iha área Mologen, suku Oe-leu, postu administrativu Bobonaro iha fulan hirak liubá.

Bazea ba desizaun hosi Tribunál iha indísiu forte katak objetu hirak-ne’e sidadaun sira hatama ho dalan  ilegál hosi Atambua, munisípiu Belu, Nusa Tengara Timur (NNT), Indonézia, mai territóriu Timor-Leste nian liuhosi fronteira terrestre suku Gildapil, postu administrativu Lolotoe, munisípiu Bobonaro.

Prokuradór Titulár ba Prosesu 0017/22 gcc, Rogério Viegas Vicente, esplika, prosesu destroisaun ne’e  kumpre de’it despaxu hosi Tribunál katak objetu hirak-ne’e maioria uza stiker Indonézia nian ne’ebé lei bandu atu sirkula iha merkadu.

“Objetivu hosi destroisaun ba objetu hirak-ne’e tanba lei la permite, liuliu dekretu-lei ne’ebé ko’alia kona-bá kontrolu Tabaku, ne’ebé Ministériu Saúde rasik fó-sai katak sigarru sira-ne’ebé atu tama mai, tenke tuir teste no hetan autorizasaun hosi saúde, ho nia objetivu atu kontrola ninia volume nikotina nune’e labele prezudika ba kestaun saúde,” nia informa ba jornalista sira hafoin prosesu destroisaun.

Hafoin prosesu destroisaun, Ministeriu Públiku hamutuk PNTL no parte sasan na’in sei asina akta  hanesan prova ida katak objetu hirak-ne’e halo ona destroisaun no akta ne’e rasik sei junta iha prosesu kontinuasaun ba julgamentu iha Tribunál.

“Desizaun tribunál halo destroisaun ne’e só apenas ba objetu, maibé ba aktu krime ne’ebé maka sira envolve konserteza prosesu imvestigasaun la’o hela, maibé ha’u labele ko’alia kona-bá substánsia hosi prosesu ne’e, ita-nia regra prosesu penál kona-bá segredu justisa,” nia argumenta.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here