INFORDEPE. Imajen/Espesiál

DILI, 13 maiu 2022 (TATOLI)–Ministériu Ensinu Superiór Siénsia no Kultura (MESSK) liuhosi ekipa Diresaun Jerál Ensinu Superiór hahú halo prosesu verifikasaun dokumentu profesór finalista nível baxarelatu na’in-2.595, ne’ebé to’o agora hein atu simu graduasaun hosi Universidade Nasionál Timor-lorosa’e (UNTL).

Ministru Ensinu Superiór Siénsia no Kultura, Longuinhos dos Santos, admite, INFORDEPE liuhosi Universidade Nasionál Timor-Lorosa’e (UNTL) haruka ona karta ba ministériu, maibé dirije ba Diresaun Jerál Ensinu Superior.

“Karta ne’e dirije ba ha’u-nia Diretora Jerál Ensinu Superior, ne’ebé sira mak halo verifikasaun ba dokumentu sira, tanba ne’e agora ita halo ona koordenasaun ho parte akadémiku inklui INFORDEPE kona-ba prosesu graduasaun,” Ministru informa iha Palásiu Governu, sesta ne’e.

Notísia relevante: UNTL-INFORDEPE realiza judisium ba profesór baxarelatu 1.500 iha munisípiu hitu

Ba kestaun ne’e, Ministru husu ba ekipa MESSK ne’ebé hala’o hela avaliasaun hodi tau atensaun didi’ak iha prosesu verifikasaun atu labele mosu fallansu iha dokumentu sira tanba prosesu verifikasaun maka sei garante kontinuasaun prosesu graduasaun estudante.

“Prosesu verifikasaun ne’e kuandu ramata ona, ministériu bele hatún despaixu ba UNTL hodi fó lisensa ba sira realiza serimónia graduasaun ba profesór sira,” nia akresenta.

Tuir dadus, graduadu profesór baxarelatu ne’ebé INFORDEPE aprezenta ona ba UNTL hodi kontinua haruka ba MESSK ne’e mantein ho 2.595 iha munisípiu neen.

Prezidente INFORDEPE, Manuel Gomes, relata, antes ne’e, serimónia judisium ba estudante sira realiza hotu ona.

“Agora hela de’it estudante iha Rejiaun Administrativu Espesiál Oé-cusse Ambeno (RAEOA) maka seidauk. Tuir planu kuandu MESSK hatún ona despaixu graduasaun maka INFORDEPE foin realiza serimónia graduasaun ba loron-ida de’it,” nia akresenta.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here