Komunidade sira kuda ai-horis iha kintál eskola. Imajen Tatoli/ Nelia Fernandes

MANATUTO, 13 maiu 2022 (TATOLI) – “Ai ba Futuru” – Parseiru bá Agrofioresta Sustentável (PSAF), ne’ebé finansiadu husi Uniaun Europea no Governu Federál Alemaña, liuhusi Ministériu ba kooperasaun ekonómiku no dezenvolvimentu (BMZ) hamutuk ho Ministériu agrikultura no peska (MAP) selebra atividade kuda ai-oan ikusliu iha Aldeia Pualaka, Suku Orlalan, Postu administrativu Laclubar, Munisípiu Manatuto.

Durante tinan haat nia laran, projetu “Ai ba Futuru” halo ona distribuisaun ai-oan ba uma-kain agrikultór sira iha área rurál sira iha munisipiu Baucau, Lautém, Manatuto ho Viqueque.

Dezde inisisu projetu Ai ba Futuru hahú iha 2017, ai-oan hamutuk 3.8 millaun  mak kuda ona hodi promove agrofloresta nu’udar estratejia sustentável ba utilizasaun rai atu hasa’e seguransa alimentár, no mós fó oportunidade empregu hodi hasa’e rendimentu komunidade rurál nian.

Agrikulór sira simu tipu ai-oan oioin hanesan ai-kameli, ai-mahoni, rambutan, sabraka, marunggi, ai-teka, nuu, ai-kakeu no seluktan. Ai-oan sira ne‘e prodús husi viveiru Quinta Portugal no viveiru MAP nian.

Selebrasaun finalizasaun distribuisaun ai-oan ne’e termina ho kuda ai-oan 2.000 resin iha aldeia Pualaka, suku Orlalan, Postu administrativu Laclubar, Munisípiu Manatuto.

Selebrasaun refere partisipa husi Vise-Ministru Agnkultura no Peska (MAP), Abílio Xavier de Araújo, Vise-Ministru komérsiu no indústria, Domingos Lopes Antunes, Embaxadór Uniaun Europeia, Andrew Jacobs, Reprezentante embaixadór Portugal iha Timor-Leste, Cristina Faustino, Koordenadór GIZ iha Timor-Leste, Rainer Schellihaas, reprezentante autoridade Munisípiu Manatuto, Eduardo Guterres, no autoridade lokál.

Vise-ministru MAP, Abilio Xavier de Araújo hateten, agrofloresta importante tebes atu sustenta no kria produtividade no paisazen furak bá Timor-Leste iha futuru: “Agrofloresta nu’udar xave ida atu hasa’e  rendimentu agrikultór sira nian, no bele mós kontribui ba dezenvolvimentu ekonomia rai-laran. Ami hakarak hato’o ami-nia agradese uain ba Ai ba Futuru no Uniaun Europea no Governu Alemaña ne’ebé support ona ami ba prosperiedade futuru ida di‘ak, liuhusi distribuisaun ai-oan ba bá ami-nia agrikultór sira iha Manatuto, Baucau, Viqueque no Lautém.”

Ezekutivu ne’e hateten kuda ai-oan millaun tolu-resin ne’e kria protesaun bá rai hodi prevene erozaun no rai-halai: “Ai-abut no ai-tahan sira nesesáriu tebes hodi taka ita-nia rai-bokur sira, nune’e mós proteje ita-nia ambiente no kontribui ba luta hasoru mudansa klimátika.”

Iha fatin hanesan, Vise-ministru komérsiu no indústria, Domingos Lopes Antunes hatutan, projetu Ai ba Futuru sei apoia ekonomia komunidade iha área rurál.

“Ai-oan industria ne’ebé mak komunidade kuda ona, loron ida sei uza hanesan ai-kabelak ba atividade mobiliáriu sira. Entaun, ai-oan sira ne’e iha tempu oin sei ajuda ekonomia komunidade nian,” nia salienta.

Nune’e mós, Embaxadór UE, Andrew Jacobs hateten, Uniaun Europeia sei kontinua ho nia kompromisu atu apoiu komunidade área rural sira hodi dezenvolve agrofloresta iha Timor-Leste.

“lta hotu hatene katak, agrofloresta hanesan xave ida atu hadi’a dezenvolve ekonómia. Mais ou menus rai hektares 35.000 ne’ebé mak di’ak ba kuda ai-oan, maibé atualmente sei mamuk hela, ita bele utiliza ho prátika implementasaun kuda ai-oan ho eskala bo’ot tuir pratika agrofioresta hodi fó serbisu signifikativu ba populasaun joven sira,” Jacobs haktuir.

UE agora daudaun prepara hela programa foun husi kuperasaun EU-Timor-Leste ba tinan hitu oin mai, ne’ebé mak sei foku ba dezenvolvimentu ekonómiku verde sustentável no redusaun pobreza: “Iha kontextu ida ne’e, buat ne’ebe importante ba Uniaun Europeia, Governu Timor-Leste no sosiedidade sívil  mak kontinua serbisu hamutuk ho kuadru agrofioresta sira.”

Koordenadór GIZ iha Timor-Leste, Rainer Schellihaas salienta projetu Ai ba Futuru komesa iha 2017 no sei termina iha novembru tinan ne’e.

“Dezde tinan 2017, projetu Ai ba Futuru implementa ona iha munisípiu ha’at iha parte leste, inklui Baucau, Lautém, Manatuto no Viqueque. Implementasaun projetu Ai ba Futuru liuhusi kuda ai-oan  hamutuk 3.8 milliaun ne’e tanba koopersaun di’ak entre MAP, UE, GIZ no autoridade lokál sira. Projetu ne’e benefísia ona uma-kain hamutuk 6.000 husi suku 40 iha munisípiu haat refere. lha époka plantasaun ikus projetu Ai ba Futuru ne’ebé mak komesa iha fulan novembru 2021, ai-oan hamutuk 1.3 millaun mak distribui ona ba komunidade sira,” nia akresenta.

Ikusliu, José da Silva Sarmento, nu’udar xefe aldeia Pualaka agradese projetu Ai ba Futuru tanba kuda ona ai-oan 2.000 resin iha ni-nia aldeia.

Jornalist: Filomeno Martins

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here