DILI, 13 maiu 2022 (TATOLI)—Prezidente Komisaun Funsaun Públika (KFP), Faustino Cardoso, sesta ne’e halo sorumutu ho Prezidente Parlamentu Nasionál (PPN), Aniceto Longuinhos Guterres Lopes, hodi entrega relatóriu servisu anuál KFP ne’ebé hala’o durante tinan 2021.
“Ohin, KFP mai hato’o relatóriu ba Prezidente Parlamentu Nasionál simbolikamente atu iha tempu tuir fali mai bele rona tempu oportunu bainhira mak KFP mai aprezenta fali iha plenária,” Prezidente KFP ne’e hateten ba jornalista sira hafoin ramata enkontru iha sala Gabinete PPN.
Nia dehan, kompeténsia Parlamentu Nasionál atu deside haree tempu tuir mai marka loron hodi KFP bele aprezenta relatóriu ne’e iha plenária.
KFP hanesan instituisaun independente ida-ne’ebé hari’i ho baze ba lei númeru 7/2009, 15 jullu, ne’ebé estabelese hosi Estadu Timor-Leste, nia hanesan orgaun responsavél atu regula no asegura Funsaun Públika ida-ne’ebé imparsiál, livre hosi interrese polítiku sira, profisionál, baze ba méritu, presta servisu ho kualidade no proporsionalidade ba povu Timor-Leste.
KFP ninia dever ida mak aprezenta relatóriu anualmente ba Parlamentu Nasionál no Governu iha fulan-marsu nia laran relasiona ho atividade KFP nian ba tinan anteriór nian.
Iha relatóriu KFP ne’e kompostu hosi informasaun sira hanesan atividade komisaun nian relativamente ho rekrutamentu, selesaun pesoál, nomeasaun sira, promosaun, avaliasaun dezempeñu, formasaun, dixiplinár, pensaun no reforma no jestаun rekursu umanu iha Funsaun Públika.
Aleinde ne’e, progama relasiona ho atividade define ona no planu asaun anuál ba servisu inspesaun no auditória no partisipasaun KFP iha ASEAN nian no inkluzaun sosiál.
Realizasaun atividade promosaun kareira rejime jerál ba datoluk ne’ebé públika ona iha jornál repúblika ne’ebé promovidu hamutuk 878 kompostu hosi feto 305 no mane 573.
Tuir dadus administrasaun públika durante tinan ida-nian, iha 31 dezembru 2021, funsionáriu kompostu hosi funsionáriu permanente no ajente administrasaun públika hamutuk 35,212 ne’ebé kompostu hosi feto 12,419 no mane 22,893.
Ba parte formasaun nian, KFP rejista sertifikadu iha sistema hamutuk 2,576 hosi totál funsionáriu hamutuk na’in-1,232 ne’ebé kompostu hosi feto 402 no mane 830.
Pensaun no reforma KFP rejista dadus ba tinan 2021 nian hamutuk 265, ne’ebé kompostu hosi feto 62 no mane 203.
Ezekusaun orsamentu ba atividade sira-ne’e, KFP nia baze ba planu asaun anuál 2021 nian, konsege ezekuta 72%, orsamentu ho totál $3,175,411.00.
Jornalista : Nelson de Sousa
Editór : Cancio Ximenes
