Jogadór Selesaun Nasionál U-23, Mario Donasio Quintão “Mbape”. Imajen/espesial.

VIETNAME, 13 maiu 2022 (TATOLI)— Jogadór Selesaun Nasionál U-23, Mario Donasio Quintão “Mbape”, klarifika katak, nia-parte tanis no halo voice note iha aeroportu tanba trauma pisikólojia bainhira Migrasaun Vietname la utoriza sai hosi aeroportu.

Kazu ne’e akontese iha loron 6 maiu, bainhira ekipa selesaun nasionál U-23, viájen hosi Malázia ba Vietname, maibé too iha aeroportu Vietname, Migrasaun la autoriza jogadór refere sai hosi aeroportu tanba naran la tama lista ekipa Timor-Leste ba partisipa SEA Games.

Notísia relevante: Abertura SEA Games 2021: TL aprezenta modalidade hitu, patrimóniu kulturál no relijiozu

“Loos duni ha’u ho maun Jornalista Agência TATOLI, Hortencio Sanchez hasoru problema uitoan iha aeroportu Vietname nian, maibé durante loron ida, FFTL hamutuk ho ita nia Governu rezolve no lori sai kedan ami na’i- rua,” Jogadór Mbape ne’e klarifika ba Agência TATOLI iha Vietname, sesta ne’e.

Nia esplika bainhira Migrasaun la autoriza sai hosi aeroportu, ho trauma halo kedan voice note hodi manda ba grupu WhatsApp jogadór selesaun nasionál U-23, maibé sente hakfodak bainhira voice note refere virál iha rede sosiál.

“Voice ne’e ha’u halo duni, maibé  ba grupu individu ka ami nia grupu jogadór U-23 nian,  maibé  ema balun copy sai tiha voice ne’e agora virál tiha, ha’u voice tanba trauma sira sai hotu ona ami la sai no  hela de’it iha aeroportu no ami la hatene ema nia lian, ne’ebé mak ha’u voice atu ami nia ofisiál sira rona no bele buka solusaun lalais,” nia esklarese.

Tanba ne’e, nia husu deskulpa ba Governu Timor-Leste no públiku atu labele intrepreta voice note ne’e no hapara halo virál tanba kestaun hotu rezolve ona.

“Deskulpa voice ida dehan loron rua ne’e laloos, maibé ami  loron ida de’it iha aeroportu loron ida, nune’e ho trauma nakdedar mak ha’u ko’alia la sadar dehan tia loron rua mais loron ida de’it ami sai ona hosi aeroportu no hetan lisensa hosi Komisaun Organizadora SEA Games no parte hotu atu halo atividade livre iha Vietname,” nia afirma.

Iha biban hanesan, Adjuntu Sekretariu Jeral FFTL, Frederico Martins, hateten Sekretáriu Estadu Juventu no Desportu (SEJD), Federasaun Futeból Timor-Leste (FFTL), hamutuk ho Komite Olimpíku Nasionál Timor -Leste (CONTL) inklui Embaixada Timor-Leste iha Vietname konsege rezolve ho Migrasaun Vietname.

“Problema jogadór Mbape ho jornalista ne’ebé iha aeroportu Vietname iha fallansu tékniku uitoan tanba naran la tama iha lista rejistu SEA Games nian, tuir regra atu tama tenke hetan vistu hosi uma-nain Vietname, ho ida ne’e ami nia líder másimu liuliu Prezidente FFTL koordena kedan ho SEJD, CONTL no Embaixada ita nian iha Vietname konsege rezolve kedan ona hodi hasai sira na’in rua atu bele tama ba Vietname,” Adjuntu FFTL ne’e akresenta.

Nia dehan, situasaun ne’e bele fanu ona FFTL, CONTL no parte hotu atu haree didiak lista ema ne’ebé atu ba partisipa iha eventu ruma.

“Loron ida iha aeroportu ha’u rasik sente ladun di’ak, maibé ami resolve hotu ona no husu ona deskulpa ba sira na’in-rua no agora hamutuk ho ekipa sira seluk iha Vietname,” Adjuntu ne’e esklarese.

Notísia relevante: TL lakon ho Myanmar 2-3 iha jogu daruak SEA Games

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here