DILI,13 maiu 2022 (TATOLI)— Diretór Ezekutivu Klínika Bairru-Pité, Inácio dos Santos, informa iha fulan janeiru too abríl 2022, konsege deteta ema ho ka paseinte foun HIV/SIDA na’in-16.
“Iha fulan janeiru too abríl, ami deteta ema ho moras HIV-SIDA foun na’in-16, hosi númeru ne’e, kompostu mane tolu no feto ida iha janeiru, mane tolu iha fevereiru, mane lima iha marsu, no feto rua no mane rua iha abríl ,”Diretór ne’e hateten ba Agência TATOLI iha knaar Bairru Pité, Dili, sesta ne’e.
Daudaun ne’e, pasiente ne’ebé halo tratamentu ba moras HIV-SIDA hamutuk 205, la konta ho sira ne’ebé lakon hosi tratamentu médiku.
“Ita koko atu sira ne’ebé mak lakon husi tatamentu ne’e bele fila fali mai tanba pasiente ne’ebé lakon hosi tratamentu médiku ne’e na’in-40 resin,” nia informa.
Tuir nia dala barak pasiente lakon hosi tratamentu tanba sira-nia fatin no hela iha Dili provizóriu de’it hodi muda fali ba iha munisípiu no defisil sira tun mai Dili atu kontinua sira nia tratamentu.
“Kazu sira ne’e durante hosi tinan 2004 mai too agora no na’in-rua mate ne’e la’ós pasiente HIV-SIDA foun maibé sira kazu tuan mak mate,” nia afirma.
Nune’e, nia dehan aimoruk ba HIV-SIDA laiha problema tanba suporta másima hosi Fundu Global hosi Ministériu Saúde.
Notísia relevante: Pasiente sira hahú halo kontribuisaun ba Klínika Bairru-Pité
Jornalista : Felicidade Ximenes
Editór : Florencio Miranda Ximenes
